“গুজৰাট নিৰ্বাচনৰ বাবেই মোক গ্ৰেপ্তাৰ কৰা হৈছে”: গ্ৰেপ্তাৰ সন্দৰ্ভত প্ৰতিক্ৰিয়া জিগনেশ মেৱানীৰ

অসম আৰক্ষীয়ে গ্ৰেপ্তাৰ কৰা গুজৰাটৰ বিধায়ক জিগনেশ মেৱানীক আজি জামিন প্ৰদান কৰে বৰপেটাৰ সত্ৰ ন্যায়াধীশৰ আদালতে। জামিন লাভ কৰাৰ পিছতে গ্ৰেপ্তাৰ সন্দৰ্ভত প্ৰতিক্ৰিয়া প্ৰকাশ কৰিছে বিজেপি বিৰোধী শিবিৰৰ অন্যতম শক্তিশালী বিধায়ক গৰাকীয়ে।

“মোৰ গ্ৰেপ্তাৰ কোনো সাধাৰণ বিষয় নহয়। এইয়া প্ৰধানমন্ত্ৰী কাৰ্যালয়ৰ ৰাজনৈতিক বিষয়াসকলৰ নিৰ্দেশনাত কৰা হৈছিল।”— মেৱানীয়ে কয়।

এই বছৰৰ শেষৰ ফালে অনুষ্ঠিত হ’বলগীয়া গুজৰাট নিৰ্বাচনৰ প্ৰতি লক্ষ্য ৰাখিয়ে শাসকীয় বিজেপিয়ে এই সকলো ষড়যন্ত্ৰ কৰি আছে বুলি অভিযোগ কৰে মেৱানীয়ে।

সংবাদ মাধ্যমৰ আগত মেৱানীয়ে কয়, “এয়া এক ষড়যন্ত্ৰ। মোৰ বিৰুদ্ধে কৰা দুয়োটা গোচৰেই মিছা। গুজৰাটত নিৰ্বাচন আহি আছে, সেয়েহে মোক লক্ষ্য কৰা হৈছে। মানুহে এই কৌশল বুজি পাইছে।”

“গুজৰাটৰ পৰা মোক গ্ৰেপ্তাৰ কৰাৰ লগে লগে মই জানিছিলো যে তেওঁলোকে মোক বিভিন্ন প্ৰকাৰে ফান্দত পেলোৱাৰ পৰিকল্পনা কৰিছে। অসমত গুজৰাটৰ এজন বিধায়কক লক্ষ্য কৰি লোৱাটো এটা ডাঙৰ ষড়যন্ত্ৰৰ অংশ।”— মেৱানীয়ে লগতে কয়।

উল্লেখ্য যে প্ৰধানমন্ত্ৰী নৰেন্দ্ৰ মোদীৰ বিৰুদ্ধে কৰা এটা টুইটৰ গোচৰত মেৱানীক কোকৰাঝাৰ আৰক্ষীয়ে প্ৰথমে গ্ৰেপ্তাৰ কৰিছিল। এই গোচৰত জামিন লাভৰ কিছু সময়ৰ পিছতেই কৰ্মৰত মহিলা আৰক্ষীক অশালীন ব্যৱহাৰ কৰাৰ অভিযোগত বৰপেটা আৰক্ষীয়ে পুনৰ গ্ৰেপ্তাৰ কৰিছিল বিধায়ক গৰাকীক।

সাংবাদিকৰ সৈতে কৰা বাৰ্তালাপত মেৱানীয়ে কয়, “মই কৰা টুইটটোৰ বাবে মই এতিয়াও গৌৰৱান্বিত। টুইটটোত মই মূলতঃ প্ৰধানমন্ত্ৰীক শান্তি আৰু সম্প্ৰীতি বজাই ৰাখিবলৈ আহ্বান জনাইছিলো। ভাৰতৰ এজন নাগৰিক হিচাপে এই বিষয়ে প্ৰশ্ন কৰিবলৈ মোৰ অধিকাৰ আছে।”

আনহাতে দ্বিতীয়টো গোচৰ সন্দৰ্ভত মেৱানীয়ে কয় যে তেওঁৰ বিৰুদ্ধে এটা গোচৰ প্ৰস্তুত কৰিবলৈ চৰকাৰে এগৰাকী মহিলাক ব্যৱহাৰ কৰিছে। চৰকাৰে ইয়াৰ দ্বাৰা কাপুৰুষালিৰ আশ্ৰয় লৈছে বুলি মেৱানীয়ে শাসনাধিষ্ঠ বিজেপি চৰকাৰক উপহাস কৰে।

বিজেপি চৰকাৰক প্ৰশ্ন কৰা বা সত্যৰ পক্ষত কথা কোৱা যিকোনো ব্যক্তিৰ বিৰুদ্ধে বিজেপিয়ে গোচৰ তৰে বুলি অভিযোগ কৰে দলিত নেতা গৰাকীয়ে।

আনহাতে অসমবাসী জনসাধাৰণ আৰু কংগ্ৰেছৰ মানুহে এই সময়ছোৱাত তেওঁক কৰা সমৰ্থন যথেষ্ট সহায়ক আছিল বুলিও কৃতজ্ঞতাৰে দোহাৰে বিধায়কজনে।