বান বিভীষিকাৰ মাজতে এটা ভাল খবৰ : কমনৱেলথ গেমছত ছেমি ফাইনেলত জিকি ফাইনেলত প্ৰৱেশ লাভলিনাৰ

কমনৱেলথ গেমছ ২০২৬ ত নৱম দিনৰ সফল সমাপ্তিৰ পাছত আজি দশম দিনা ভাৰতৰ বাবে এক অতি গুৰুত্বপূৰ্ণ দিন হ’বলৈ গৈ আছে। শুকুৰবাৰে ভাৰতৰ পদকৰ সংখ্যা ২৩ টালৈ বৃদ্ধি পোৱাৰ পাছত আজি দেশবাসীৰ আশা আৰু অধিক বাঢ়িছে। আজিৰ দিনটোত ভাৰতীয় খেলুৱৈসকলে পদকৰ সংখ্যা ৪০ ৰ সীমা অতিক্ৰম কৰাৰ এক সুন্দৰ সুযোগ লাভ কৰিছে। বিশেষকৈ বক্সিঙত আজি ভাৰতৰ বাবে এক বৃহৎ দিন কাৰণ ১০ গৰাকী ভাৰতীয় বক্সাৰ ফাইনেলত অৱতীৰ্ণ হ’ব। যদি সকলোৱে সোণৰ পদক জিনিবলৈ সক্ষম হয়, তেন্তে সেয়া কমনৱেলথ গেমছৰ ইতিহাসত ভাৰতৰ বাবে এক বিৰল অভিলেখ হ’ব।

আজিৰ দিনটোত সমগ্ৰ দেশৰ লগতে অসমবাসীৰ দৃষ্টি নিবদ্ধ থাকিব অসম কন্যা লাভলিনা বৰগোহাঁইৰ ওপৰত। নিশা ১০ বাজি ১৫ মিনিটত মহিলাৰ ৭৫ কিলোগ্ৰাম শাখাৰ ফাইনেলত লাভলিনা ৰিঙত নামিব। তেওঁৰ উপৰিও প্ৰীতি, জেছমিন, জাদুমণি সিং, সাক্ষী, প্ৰিয়া, অৰুন্ধতী চৌধুৰী, শচীন, অংকুশ পাংঘল আৰু নৰেন্দ্ৰই নিজৰ নিজৰ শাখাৰ ফাইনেল খেলি দেশলৈ সোণৰ পদক অনাৰ চেষ্টা কৰিব। দুপৰীয়া ৩ বাজি ৩০ মিনিটৰ পৰা নিশা পৰ্যন্ত এই বক্সিং প্ৰতিযোগিতাসমূহ চলিব।

বক্সিঙৰ সমান্তৰালকৈ এথলেটিকছ আৰু পেৰা এথলেটিকছতো ভাৰতৰ কেইবাগৰাকীও খেলুৱৈ আজি খেলপথাৰত নামিব। পুৰুষৰ ট্ৰিপল জাম্পৰ ফাইনেলত দুপৰীয়া ২ বাজি ৪০ মিনিটত প্ৰবীণ চিত্ৰভেল আৰু চেলভা প্ৰভুৱে পদকৰ বাবে যুঁজ দিব। আনহাতে মহিলাৰ ১০ হাজাৰ মিটাৰ ৰেচ ৱাক ফাইনেলত প্ৰিয়ংকা গোস্বামী আৰু ৰবিনা গায়কৱাড়ে অংশগ্ৰহণ কৰিব। নিশা পল ভল্টৰ ফাইনেলত দেৱ কুমাৰ মীনা আৰু কুলদীপ কুমাৰে প্ৰদৰ্শন আগবঢ়াব। ইয়াৰ উপৰিও নিশা ১২ বাজি ১৫ মিনিটত গুলবীৰ সিঙে পুৰুষৰ ৫০০০ মিটাৰৰ ফাইনেল আৰু তাৰ পাছতে মিক্সড চাৰিশ মিটাৰ ৰিলে ফাইনেল অনুষ্ঠিত হ’ব। পেৰা এথলেটিকছত সোমন ৰাণা, শুভম জুয়াল আৰু ৰমেশ শণ্মুগমে নিজৰ নিজৰ ইভেণ্টৰ ফাইনেল খেলি দেশলৈ গৌৰৱ কঢ়িয়াই অনাৰ প্ৰয়াস কৰিব।

নৱম দিনা জুডোত তিনিটা পদক লাভ কৰাৰ পাছত আজি জুডোকাসকলৰ পৰাও যথেষ্ট আশা কৰা হৈছে। উন্নতি শৰ্মা, কৰণজিৎ সিং মান, হৰ্ষ টকাছ আৰু ইনুংগানবীয়ে আজি নিজৰ নিজৰ মেচত অৱতীৰ্ণ হ’ব। আনহাতে ট্ৰেক চাইক্লিঙত দুপৰীয়া ২ বাজি ৩০ মিনিটৰ পৰা ডেভিদ বেকহাম, ৰোনাল্ডো সিং, ৰজিৎ সিং, হৰ্ষবীৰ সিং আৰু দীনেশ কুমাৰে কোৱালিফাইং মেচ খেলিব। একেদৰে লন বলছত পুৰুষৰ পেয়াৰ্ছ শাখাত নৱনীত সিং আৰু দীনেশ কুমাৰে অংশগ্ৰহণ কৰাৰ বিপৰীতে নিশা ১০ বাজি ২০ মিনিটত অসমৰ আন এগৰাকী গৌৰৱ নয়নমণি শইকীয়াই মহিলাৰ ছিংগলছৰ ছেকচনেল প্লে’ত অংশগ্ৰহণ কৰি নিজৰ শ্ৰেষ্ঠ প্ৰদৰ্শন আগবঢ়াবলৈ চেষ্টা কৰিব।