যোৰাবাট আৰক্ষীৰ জালত ৫ জনীয়া ডকাইতৰ দল, চোকা অস্ত্ৰ জব্দ
যোৰাবাটত ডকাইতৰ বিৰুদ্ধে আৰক্ষীৰ অভিযান।
কিছুদিন ধৰি ৩৭ নং ৰাষ্ট্ৰীয় ঘাই পথত দুধর্ষ ডকাইতৰ এটা দল সন্ত্ৰাস চলাই আহিছিল।
যোৰাবাট আৰক্ষীৰ ভাৰপ্ৰাপ্ত বিষয়া কপিল পাঠকে নিজা গোপনসূত্ৰ পমখেদি বুধবাৰে সন্ধিয়াৰ পৰা এক অভিযান চলাইছিল।
কালি মাজ নিশা প্ৰায় ১২.৩০ বজাত গুৱাহাটী অভিমুখে আহি থকা এখন অট’ত পাঁচ জন লোক আহি থকা অৱস্থাত যোৰাবাট উৰণীয়া সেঁতুৰ তলত আৰক্ষীয়ে তালাচীৰ বাবে ৰখায়।
তেওঁ লোকক তালাচী কৰোঁতে চোকা অস্ত্ৰ আৰু ডকাইতিত ব্যৱহাৰ হোৱা বহু ধৰণৰ আপত্তিজনক সামগ্ৰী জব্দ কৰিবলৈ সক্ষম হৈছে যোৰাবাট আৰক্ষীয়ে।
জানিবপৰা মতে এই ডকাইতি দলৰ সদস্য কেইজনৰ নাম ক্ৰমে নলবাৰীৰ মনি কলিতা, সোণাপুৰ আমতলাৰ লেবিয়ান বড়ো আৰু হৰিচন্দ্ৰ দেৱ, ১৫ মাইল হগ্ৰাপাৰাৰ নাছিৰ আলি আৰু সৰুতাৰিৰ বিকি ছেত্ৰী।
দলটোৰ পৰা দুখন দা, চুৰি, স্ক্ৰ ড্ৰাইভাৰ আৰু অন্যান্য সামগ্ৰী জব্দ কৰিবলৈ সক্ষম হয় আৰক্ষীয়ে।ডকাইতি কাণ্ডৰ বাবে ওলাই আহিয়েই যোৰাবাট আৰক্ষীৰ জালত পৰে ৫ জনীয়া ডকাইতৰ দলটো।