গ্ৰেমী জিকিলে দালাই লামাই; কোনটো শিতানত তেওঁ লাভ কৰিলে এই বঁটা?

দেওবাৰে নিশা (ভাৰতীয় সময় অনুসৰি সোমবাৰে পুৱাৰ ভাগত) দালাই লামাৰ জীৱনত আন এক সন্মান সংযোজন হ’ল। আধ্যাত্মিক জগতৰ কিংবদন্তি গৰাকীয়ে এইবাৰ পপ সংস্কৃতিৰ ভিতৰতো নিজৰ স্থান দখল কৰিলে—৬৮ সংখ্যক গ্ৰেমী বঁটাৰ মঞ্চত। দেওবাৰে (১ ফেব্ৰুৱাৰী) লছ এঞ্জেলছত আয়োজিত অনুষ্ঠানত তেওঁ বেষ্ট অডিঅ’বুক, নেৰেচন এণ্ড ষ্টোৰী টেলিং ৰেকৰ্ডিঙৰ বঁটা লাভ কৰে।

মাত্ৰ ৯ বছৰ বয়সৰ পৰাই তিব্বতী আধ্যাত্মিকতাৰ ৰাষ্ট্ৰদূত হিচাপে বিশ্ব মঞ্চত উজলি উঠা দালাই লামাই ৯০ বছৰ বয়সত এনে আন্তঃৰাষ্ট্ৰীয় সংগীতৰ স্বীকৃতি লাভ কৰাটো নিঃসন্দেহে ঐতিহাসিক।

এই শাখাৰ প্ৰতিযোগিতা যথেষ্ট কঠিন আছিল। এই তালিকাত আছিল আয়োজক ট্ৰেভৰ নোৱাহ নিজেই, আমেৰিকাৰ উচ্চতম ন্যায়ালয়ৰ ন্যায়াধীশ কেটাঞ্জি ব্ৰাউন জেকচন আৰু মিলি ভেনিলিৰ ফেব মৰ্ভান। সকলোকে অতিক্ৰমি আগবাঢ়ি ওলাই আহিল দালাই লামা—যাৰ ফলত বঁটা ঘোষণা হোৱাৰ লগে লগে ছ’চিয়েল মিডিয়াত আৰম্ভ হ’ল বিস্ময় আৰু অভিনন্দনৰ জোৱাৰ ।

ইউটিউবত লাইভষ্ট্ৰীম কৰা প্ৰি-টেলিকাষ্ট ৰাউণ্ডৰ সময়ত এই বঁটা ঘোষণা কৰা হয়। দালাই লামা উপস্থিত নাছিল আৰু তেওঁৰ ঠাইত গায়ক-গীতিকাৰ ৰুফাছ ৱেইনৰাইটে মঞ্চত ট্ৰফী গ্ৰহণ কৰিছিল। মাইকটো লৈ তেওঁ প্ৰথমে ক’লে, “ঠিক আছে, মই দালাই লামা নহয়—সেয়া স্পষ্ট!” তাৰ পিছত তেওঁ ক’লে যে এনে দয়া, মমতা, আত্মচিন্তাৰ বাৰ্তাৰ ওপৰত ভিত্তি কৰি এটা প্ৰকল্পত কাম কৰাটো তেওঁৰ বাবে এক অবিশ্বাস্য সন্মান। ইয়াতকৈ বেছি আৰু কি পাব পাৰিলেহেঁতেন!

বঁটা বিজয়ী প্ৰকল্পটোৰ নাম হৈছে মেডিটেচনছ: দ্য ৰিফ্লেকচনছ অৱ হিজ হলিনেছ দ্য দালাই লামা—এটা কথিত শব্দৰ ধ্যানৰ এলবাম, য’ত দালাই লামাৰ শান্তিৰ বাৰ্তাৰ সৈতে মিহলি হৈ আছে হিন্দুস্তানী শাস্ত্ৰীয় সংগীতৰ সুৰ। আত্মানুসন্ধান, কৰুণা, জাগতিক ভাৰসাম্য- এই মূল্যবোধসমূহে হৈছে এলবামটোৰ মূল ভেটি।

আশ্চৰ্যজনকভাৱে আধ্যাত্মিকতা, ৰাজনীতি, সামাজিক চিন্তা-চৰ্চা সকলো সামৰি ভাষণ দিয়া দালাই লামাৰ কণ্ঠই এইবাৰ মূলসুঁতিৰ বিশ্ব সংগীতৰ দৰ্শককো চুই গ’ল। ফলত বহুতে গ্ৰেমী মঞ্চত তেওঁৰ জয়ক “আধ্যাত্মিকতাৰ পপ সংস্কৃতি জয়” বুলি অভিহিত কৰিছে।

আনকি ৬৮ সংখ্যক গ্ৰেমীত লেডী গাগা, কেণ্ড্ৰিক লামাৰ, বেড বানিৰ দৰে বিখ্যাত শিল্পীৰ ভিৰৰ মাজতো দালাই লামাৰ এই অনন্য সফলতাই সুকীয়া পৰিচয় দাঙি ধৰিব।