ধিক! দলিত শিক্ষাৰ্থীক লেট্ৰিনৰ টেংকি চাফা কৰাবলৈ বাধ্য বিদ্যালয়ৰ প্ৰধান শিক্ষক, শিক্ষকৰ

কৰ্ণাটকৰ কোলাৰৰ এখন বিদ্যালয়ৰ ঘটনাই সৃষ্টি কৰিছে তীব্ৰ চাঞ্চল্যৰ। বিদ্যালয়খনৰ কেইগৰাকীমান দলিত শিক্ষাৰ্থীক চাফা কৰিবলৈ দিয়াৰ লগতে আন কেইজনমান ছাত্ৰক তীব্ৰ শাস্তি দি গ্ৰেপ্তাৰ হৈছে প্ৰধান শিক্ষকৰ লগতে আন এজন শিক্ষক।

এই দুই শিক্ষকৰ লগতে চাৰিজন ঠিকাভিত্তিক কৰ্মচাৰীক ঘটনাটোৰ বাবে বৰ্খাস্ত কৰা হৈছে। প্ৰকাশিত খবৰ অনুসৰি, এই ঘটনা কোলাৰৰ মোৰাৰজী দেশাই আৱাসিক বিদ্যালয়ত সংঘটিত হৈছে।

প্ৰকাশ পোৱা ভিডিঅ’ তথা কিছু ছবিত বিদ্যালয় চৌহদৰ ভিতৰত কিছু দলিত ছাত্ৰ-ছাত্ৰীয়ে এটা লেট্ৰিনৰ টেংকি চাফা কৰি থকা অৱস্থাত দেখা গৈছে। আন এটা ভিডিঅ’ত ছাত্ৰ-ছাত্ৰীসকলে নিশা পিঠিত গধুৰ স্কুলবেগসহ আঁঠু লৈ থকা দেখা গৈছে।

উল্লেখ্য যে, বিদ্যালয়খনত ষষ্ঠ শ্ৰেণীৰ পৰা নৱম শ্ৰেণীলৈকে ১৯ গৰাকী ছাত্ৰীকে ধৰি মুঠ ২৪৩ গৰাকী শিক্ষাৰ্থী আছে। জানিব পৰা মতে, শাস্তি স্বৰূপে চাৰিজন ছাত্ৰক লেট্ৰিনৰ টেংকিটো হাতেৰে চাফা কৰিবলৈ বাধ্য কৰোৱা হৈছিল।

এই চাঞ্চল্যকৰ দৃশ্য ভাইৰেল হৈ পৰাৰ পিছতে তীব্ৰ প্ৰতিক্ৰিয়াৰ সৃষ্টি হয় আৰু সেয়ে মুখ্যমন্ত্ৰী সিদ্দাৰমাইয়াই লগে লগে ঘটনাত হস্তক্ষেপ কৰে। অভিযুক্ত প্ৰধান শিক্ষক ভৰতম্মা আৰু শিক্ষক মুনিয়াপ্পাক তাৎক্ষণিকভাৱে গ্ৰেপ্তাৰ কৰা হৈছে।

তেওঁলোকক লগতে তৎকালীনভাৱে কাৰ্যকৰী হোৱাকৈ গাফিলতি আৰু কৰ্তব্যত অৱহেলাৰ অভিযোগত চাকৰিৰ পৰা নিলম্বন কৰা হৈছে। এই ঘটনাই কৰ্ণাটকৰ আৱাসিক বিদ্যালয়সমূহত শিক্ষাৰ্থীৰ ওপৰত চলোৱা নিৰ্যাতনৰ আন এক দিশ উন্মোচন কৰিছে।