দৰঙত আৰক্ষীৰ জালত দুৰ্ধৰ্ষ ডকাইতৰ দল

গুৱাহাটীৰ হাতীগাঁৱৰ ডকাইতি কাণ্ডৰ সৈতে জড়িত তিনিজন দুৰ্ধৰ্ষ ডকাইতক খাৰুপেটীয়া থানাৰ আৰক্ষীয়ে সোমবাৰে নিশা গ্ৰেপ্তাৰ কৰিবলৈ সক্ষম হয়।

গ্ৰেপ্তাৰ হোৱা ডকাইত তিনিজন ক্ৰমে মহিদুল ইছলাম, জয়নাল আবেদিন আৰু মুছফিকুৰৰ আহমেদ বুলি জানিব পৰা গৈছে।

গোপন সূত্ৰৰ পৰা লাভ কৰা খবৰৰ ভিত্তিত খাৰুপেটীয়া আৰক্ষী থানাৰ এটা আৰক্ষীৰ দলে অভিযান চলাই দুৰ্ধৰ্ষ ডকাইত তিনিজনক গ্ৰেপ্তাৰ কৰিবলৈ সক্ষম হয়।

খাৰুপেটীয়া থানাৰ ভাৰপ্ৰাপ্ত আৰক্ষী বিষয়া বিৰাজ মোহন ডেকাৰ নেতৃত্বত চলোৱা অভিযানৰ সময়তে গ্ৰেপ্তাৰ হয় ডকাইত তিনিজন।

গুৱাহাটীৰ হাতীগাঁও আৰক্ষী থানাত গ্ৰেপ্তাৰ হোৱা ডকাইত কেইজনৰ বিৰুদ্ধে ইতিমধ্যে এটা গোচৰ পঞ্জীয়ন হৈ আছে বুলি আৰক্ষী সূত্ৰত প্ৰকাশ পাইছে।

আনহাতে, দৰং আৰক্ষীয়ে বৰ্তমান জেৰা চলাই থকা ধৃত ডকাইত কেইজন গুৱাহাটীৰ লগতে দৰং জিলাত সংঘটিত ভালেকেইটা ডকাইতি কাণ্ডৰ সৈতে জড়িত হৈ আছে বুলি আৰক্ষীৰ তৰফৰ পৰা প্ৰকাশ কৰা হয়।

আৰক্ষীৰ জেৰাত দৰং জিলাত সক্ৰিয় হৈ থকা ভালেমান ডকাইতৰ চক্ৰৰ বিষয়ে আৰক্ষীয়ে তথ্য লাভ কৰাৰ সম্ভাৱনা আছে।