কোভিড ভেকচিন লোৱাৰ এমাহ পাছতে কৰ’নাত আক্ৰান্ত হ’ল আৰ এছ এছৰ মুৰব্বী মোহন ভাগৱত

ৰাষ্ট্ৰীয় স্বয়ং সেৱক সংঘ (আৰ এছ এছ)ৰ সৰসংঘচালক মোহন ভাগৱতৰ কোভিড-১৯ পজিটিভ ধৰা পৰিছে আৰু তেওঁ বৰ্তমান নাগপুৰৰ এখন ব্যক্তিগত হাস্পাতলত চিকিৎসাধীন হৈ আছে।

সংঘৰ কাৰ্যকৰ্তাই জানিবলৈ দিয়া মতে আৰ এছ এছৰ মুৰব্বীগৰাকী সামান্য কাহ আৰু চৰ্দিত ভূগিছিল আৰু আৰটি-পিচিআৰ টেষ্ট কৰাইছিল।

কোভিড-১৯ পজিটিভ ধৰা পৰাৰ পাছত ভাগৱতক শুকুৰবাৰে কিংছৱে হাস্পাতলত ভৰ্তি কৰা হয়।

আনহাতে, যোৱা ৭ মাৰ্চত কোভিড-১৯ ভেকচিনৰ প্ৰথমটো ড’জ গ্ৰহণ কৰা ৭০ বছৰীয়া ভাগৱতে চিকিৎসাৰ সময়ত ভাল সঁহাৰি দিছে আৰু তেওঁৰ বৰ্তমান অৱস্থা সুস্থিৰ বুলি কোৱা হৈছে।

সম্প্ৰতি চলি থকা মহামাৰীৰ ভয়াংকৰ দ্বিতীয়টো ঢৌত মুম্বাই আৰু পুনেৰ পাছতে আটাইতকৈ বেয়াকৈ সংক্ৰমণ ঘটা ৰাজ্যৰ কৰ’নাৰ হটস্পট হিচাপে পৰিচিত হৈছে ৰাজ্যখনৰ দ্বিতীয় ৰাজধানী চহৰ নাগপুৰ।