বঙাইগাঁৱৰ জলজীৱন মিছনৰ কাম পৰিদৰ্শন উপায়ুক্ত এম এচ লক্ষ্মী প্ৰিয়াৰ

বঙাইগাঁও জিলাৰ উপায়ুক্ত ডা: এম এচ লক্ষ্মী প্ৰিয়াই জল জীৱন মিছনৰ অধীনত জিলাখনত চলি থকা উত্তৰ শালমাৰা, দেওহাটী, শিঙিমাৰী, আমতলা, চক্ৰভূম আৰু সৃজনগ্ৰাম আদি ছয়টা পাইপ পানী যোগান আঁচনিৰ কাম পৰিদৰ্শন কৰে।

অতিৰিক্ত উপায়ুক্ত তথা উত্তৰ শালমাৰা মহকুমাৰ মহকুমাধিপতি পাৰ্থসাৰথি জহৰী,সহকাৰী আয়ুক্ত মাছুম ইউছুফ আহমেদ, জনস্বাস্থ্য কাৰিকৰী বিভাগৰ কাৰ্যবাহী অভিযন্তা শান্তনু সূত্ৰধৰৰ লগতে বিভাগটোৰ অন্যান্য বিষয়ববীয়াই পৰিদৰ্শনকালত উপায়ুক্তগৰাকীক সংগ দিয়ে।

উপায়ুক্তগৰাকীয়ে সংশ্লিষ্ট সকলোকে যথাসম্ভৱ সোনকালে বাকী থকা কামবোৰ সম্পূৰ্ণ কৰি গাঁৱৰ প্ৰতিঘৰ পৰিয়ালতে কাৰ্যক্ষম গৃহ নল সংযোগৰ জৰিয়তে বিশুদ্ধ খোৱাপানী যোগান ধৰিবলৈ নিৰ্দেশ দিয়ে।

উপায়ুক্ত ডা: লক্ষ্মী প্ৰিয়াই উত্তৰ শালমাৰা মহকুমাৰ মহকুমাধিপতিগৰাকীৰ লগতে সহকাৰী আয়ুক্তক সংশ্লিষ্ট পাইপৰ পানী ব্যৱহাৰকাৰী কমিটীৰ লগত  আলোচনা কৰি গ্ৰহণযোগ্য মাহেকীয়া মাচুলৰ পৰিমাণ নিৰ্ধাৰণ কৰিবলৈও পৰামৰ্শ দিয়ে।

উল্লেখ্য যে জিলাখনত জল জীৱন মিছনৰ অধীনত ১৪২টা( এশ বিয়াল্লিশটা) পাইপ পানী যোগান আঁচনিৰ কাম চলি আছে আৰু এই আঁচনিসমূহৰ কাম সম্পূৰ্ণ হ’লে ৪৩,০০০( তিয়াল্লিশ হেজাৰ) ত কৈও অধিক পৰিয়ালক কাৰ্যক্ষম গৃহ নল সংযোগেৰে বিশুদ্ধ খোৱাপানী যোগান ধৰিব পৰা যাব।