বঙাইগাঁও অভিযান্ত্ৰিক কলেজৰ কাম-কাজ পৰিদৰ্শন কৰিবলৈ বিষয়াক নিৰ্দেশ উপায়ুক্তৰ

বঙাইগাঁও জিলাৰ উপায়ুক্ত ডা: এম এচ লক্ষ্মী প্ৰিয়াই  জিলাখনৰ বিভিন্ন বিভাগৰ অধীনত চলি থকা উন্নয়নমূলক কাম  কাজসমূহৰ পৰ্যালোচনা কৰে।

জিলা উপায়ুক্ত কাৰ্যালয়ৰ সভাকক্ষত  অনুষ্ঠিত সভাত জিলাখনৰ লোকনিৰ্মাণ গৃহ বিভাগৰ অধীনত চলি থকা কাম-কাজৰ পৰ্যালোচনা কৰে ৷

সভাত বিভাগীয় সহকাৰী কাৰ্যবাহী অভিযন্তাই জনোৱা মতে বঙাইগাঁও অভিযান্ত্ৰিক কলেজৰ অধ্যক্ষৰ কাৰ্যালয় আৰু অতিথি গৃহৰ নিৰ্মাণৰ কাম আগবঢ়াৰ লগতে শ্ৰেণী কোঠা, ছাত্ৰাৱাস, ছাত্ৰী নিৱাস, ৱৰ্কশ্বপ গৃহ, খেলপথাৰ আদিৰ বাবে মাটি কাটি থকা হৈছে।

ইয়াৰ পিছতে   উপায়ুক্তগৰাকীয়ে  অভিযান্ত্ৰিক কলেজৰ কাম-কাজ পৰিদৰ্শন কৰিবলৈ সদৰ মহকুমাধিপতিক সহকাৰী কাৰ্যবাহী অভিযন্তাগৰাকীৰ সৈতে যাবলৈ কয় ।

আনহাতে একোলেণ্ড আৰ্হিত বনাবলগীয়া বঙাইগাঁও ইকো-পাৰ্কৰ চাৰিসীমাৰ বেৰ, বোটিং পুখুৰী, খোজকঢ়া ক্ষেত্ৰ আদিৰ কামৰ লগতে জিলা বিজ্ঞান কেন্দ্ৰ আৰু প্লেনেটৰিয়াম, কোচ-ৰাজবংশী মিউজিয়াম আদিৰ কামো চলি আছে বুলি লোকনিৰ্মাণ গৃহ বিভাগৰ অভিযন্তাগৰাকীয়ে সভাত জনায় ৷

উপায়ুক্তগৰাকীয়ে সভাত  লোকনিৰ্মাণ ক্ষেত্ৰীয় পথ সংমণ্ডলৰ অধীনত বৰ্তমান যিবিলাক কাম আধৰুৱা হৈ আছে সেইবিলাক কাম সম্পূৰ্ণ কৰিবলৈ আৰু যিবিলাক কাম এতিয়ালৈ আৰম্ভ কৰা হোৱা নাই সেইবিলাক কাম আৰম্ভ কৰিবলৈ নিৰ্দেশ দিয়ে। ইপিনে বৃহস্পতিবাৰে অনুষ্ঠিত আন এখন পৰ্যালোচনা সভাত উপায়ুক্তগৰাকীয়ে হস্ত তাঁত আৰু বস্ত্ৰ শিল্প, ৰেচম, মীন, পশুপালন, সমবায়, জিলা উদ্যোগ আৰু বাণিজ্য বিভাগ,ভূমি সংৰক্ষণ, ৰাষ্ট্ৰীয় গ্ৰাম্য জীৱিকা মিছন, ৰাষ্ট্ৰীয় নগৰীয়া জীৱিকা মিছন আদি বিভাগৰ কাম-কাজৰ পৰ্যালোচনা কৰে।

হস্ত তাঁত বিভাগৰ অধীক্ষকে উপায়ুক্তৰ নিৰ্দেশমৰ্মে জিলাখনত এক জৰীপ চলায় আৰু বৰ্তমানলৈকে ৩,৩৭৬ গৰাকী শিপিনী চিনাক্ত কৰে । তদুপৰি সঞ্চালকৰ পৰা পোৱা লক্ষ্য মতে ১০০ গৰাকী শিপিনীক মুদ্ৰা ঋণ দিয়াৰ বাবে ব্যৱস্থা হাতত লৈছে। ৰেচম বিভাগৰ মুগা মিছনৰ অধীনত নয়াগাঁও, বইটামাৰী আৰু খগৰপুৰত তিনিখন চোম গছৰ নাৰ্চাৰী স্থাপন কৰা হৈছে আৰু তাত ১২,০০০( বাৰ হেজাৰ) চোম গছৰ পুলি ৰোপন কৰা হৈছে বুলি ৰেচম অধীক্ষকে জনায়।

আনহাতে মীন বিভাগৰ অধীনত বঙাইগাঁও ইকো-পাৰ্কত নিৰ্মাণ কৰা পাব্লিক একুৱাৰিয়ামৰ কাম সম্পূৰ্ণ হৈছে বুলি মীন উন্নয়ন বিষয়াই জনায় ৷ সেইদৰে আন আন বিভাগবোৰেও তেওঁলোকৰ কাৰ্যালয়ৰ অধীনত হৈ থকা কামবোৰৰ বিষয়ে উপায়ুক্ত ডা:এম এচ লক্ষ্মী প্ৰিয়াক অৱগত কৰে।