চাৰি বছৰ আগতে মৃত বুলি শেষকৃত্য সম্পন্ন কৰা অসমৰ মহিলা উদ্ধাৰ বাংলাদেশৰ ৰাজপথত

মৃত্যু হোৱা বুলি বিশ্বাস কৰি এটা অচিনাক্ত মৃতদেহকে চাৰি বছৰ আগতে শেষকৃত্য সম্পন্ন কৰা এগৰাকী অসমীয়া মহিলা জীৱন্ত অৱস্থাত ঘুৰি ফুৰিছে বাংলাদেশৰ ৰাজপথত। নিউ ইণ্ডিয়া এক্সপ্ৰেছত প্ৰকাশ পাইছে এই বাতৰি।

ৰূপালী বাইলুং নামৰ ৪১ বছৰীয়া মহিলাগৰাকীক অসমীয়া নিউজ চেনেল এটাৰ কাৰ্যসূচীত ছবি দেখি পৰিয়ালৰ লোকে চিনাক্ত কৰে। অলপতে ইয়াত এগৰাকী বাংলাদেশী ফেচবুক ব্যৱহাৰকাৰী কিষান ভূমিজে প’ষ্ট কৰা ফটো আৰু ভিডিঅ’ শ্বেয়াৰ কৰা হৈছিল।

মানসিকভাৱে অসুস্থ মহিলাগৰাকী কেনেকৈ বাংলাদেশ পালে সেই বিষয়ে সকলোৱে অজ্ঞাত। তেওঁ দেশখনৰ মৌলবীবাজাৰ জিলাৰ ৰাজপথত প্ৰায়ে দিকবিদিক শূন্যভাৱে ঘুৰি ফুৰে আৰু মানুহে আগবঢ়োৱা খাদ্য গ্ৰহণ কৰি জীয়াই আছে।

বাতৰি অনুসৰি, বিগত ২০১৫ চনৰ মে’ মাহত অৰুণাচল প্ৰদেশৰ সীমান্তৰ অসমৰ ধেমাজি জিলাৰ তেওঁৰ কাষৰে এখন গাওঁ চিচিবৰগাঁৱৰ পৰা ৰূপালী নিৰুদ্দেশ হৈছিল। তেওঁ নিজৰ গাওঁখনৰ কাষতে অনুষ্ঠিত হৈ থকা এখন বিহু ফাংছনলৈ গৈছিল।

ৰূপালীৰ জ্যেষ্ঠ ভাতৃ যুগল বাইলুঙৰ উদ্ধৃতিৰে নিউ ইণ্ডিয়ান এক্সপ্ৰেছত কোৱা হৈছে, ‘’ যদিওৱা তাই মানসিকভাৱে সুস্থিৰ নাছিল, তথাপি তাই সদায় বাহিৰলৈ ওলাই গ’লে ঘৰলৈ উভতি আহিছিল। সেইদিনা, তাই যেতিয়া উভতি অহা নাছিল, আমি বিভিন্ন ঠাইত বিচাৰ-খোচাৰ কৰি চাইছিলো আৰু পাছত আৰক্ষীৰ ওচৰত নিৰুদ্দেশ হোৱাৰ বিষয়ে লিখিতভাৱে জনাইছিলো। কেইদিনমান পাছতে গাঁৱৰ লোকে এখন নদীৰ পাৰত এগৰাকী মহিলাৰ উৱলি যোৱা মৃতদেহ প্ৰত্যক্ষ কৰে আৰু আমি সকলোৱে সেইটো তাইৰে আছিল বুলি ভাবিছিলো। আমি মৃতদেহটো ঘৰলৈ লৈ আনি শেষকৃত্য সমাপন কৰিছিলো।‘’

অবিবাহিত ভনীয়েকগৰাকীয়ে দ্বাদশ শ্ৰেণী উত্তীৰ্ণ হোৱাৰ পাছতে অসুস্থ হৈ পৰাৰ কথা সদৰী কৰিছে যুগলে। তেওঁ তাইক ঘৰলৈ ওভতাই অনাৰ বাবে সহায় বিচাৰি জিলা প্ৰশাসন, স্থানীয় বিধায়ক তথা সাংসদৰ সৈতে যোগাযোগ কৰিছে। দুটাকৈ ভিডিঅ’ত দেখা মহিলাগৰাকী যে তেওঁৰেই ভনীয়েক ৰূপালী তাত অকণো সন্দেহ নাই বুলি যুগল বাইলুঙে জানিবলৈ দিয়ে।

মুখ্য মন্ত্ৰী সৰ্বানন্দ সোণোৱালে এই ক্ষেত্ৰত ৰাজ্য চৰকাৰে সকলো ব্যৱস্থা গ্ৰহণ কৰাৰ আশ্বাস দিছে।‘’আন এখন দেশ জড়িত হৈ পৰা বাবে, আমি বৈদেশিক পৰিক্ৰমা মন্ত্ৰালয়ক আহ্বান জনাম। মন্ত্ৰালয়ে প্ৰয়োজনীয় সকলো ব্যৱস্থা গ্ৰহণ কৰিব,’’-তেওঁ কয়।

আনহাতে, ৰূপালীয়ে এতিয়াও অসমতেই থকা বুলি বিশ্বাস কৰে।

‘’মই বাংলাদেশৰ নাগৰিক নহয় আৰু মই বাংলাদেশলৈ যোৱা নাছিলো। আপুনি কিয় মুৰ্খৰ দৰে কথা কৈছে? এইখন ভাৰত। মই ভাৰতৰ নাগৰিক। জিলাখন হৈছে লখিমপুৰ(ধেমাজিৰ এখন চুবুৰীয়া জিলা),’’-এটা ভিডিঅ’ কৰা ব্যক্তিজনক খঙেৰে ৰূপালীয়ে এইদৰে কোৱা শুনা যায়।