অসমত ক’ৰ’নাত আক্ৰান্ত হৈ মৃত্যু হোৱা লোকৰ সংখ্যা ৯ গৰাকীলৈ বৃদ্ধি
বৰপেটাৰ ফখৰুদ্দিন আলী আহমেদ চিকিৎসা মহাবিদ্যালয় হাস্পতালত ক’ভিড-১৯ত আক্ৰান্ত এগৰাকী ৰোগীৰ আজি মৃত্যু হয়।
মৃত্যু হোৱা ৰোগীজন বঙাইগাঁও জিলাৰ যোগীঘোপাৰ জইনুদ্দিন (৪০) বুলি জানিব পৰা গৈছে।
জানিব পৰা মতে বঙাইগাঁও মডেল হাস্পতালত চিকিৎসাধীন অৱস্থাত ক’ভিড-১৯ত আক্ৰান্ত ৰোগী জইনুদ্দিনৰ ভুলৰ বাবে মূৰত আঘাত পাইছিল।
মূৰত আঘাত পোৱা জইনুদ্দিনক উন্নত চিকিৎসাৰ বাবে ১৬ জুনত বৰপেটাৰ ফখৰুদ্দিন আলী আহমেদ চিকিৎসা মহাবিদ্যালয় হাস্পতালত ভৰ্তি কৰা হৈছিল যদিও আজি তেওঁৰ মৃত্যু হয়৷
উল্লেখ্য যে, ক’ৰ’নাত আক্ৰান্ত হৈ অসমত বৰ্তমানলৈকে মৃত্যু হোৱা লোকৰ সংখ্যা ৯ গৰাকীলৈ বৃদ্ধি পালে।
ইফালে এতিয়ালৈকে অসমত ৪৬৯৪ গৰাকী লোক ক’ৰ’নাত আক্ৰান্ত হৈছে আৰু ইয়াৰে ২৬৪২ গৰাকী লোক সুস্থ হৈ উঠিছে বুলি স্বাস্থ্য বিভাগে জনায়।