গোটেই পৰিয়ালটোৱে শেষ! ইৰাণৰ সৰ্বোচ্চ নেতা আয়াতুল্লাহ আলী খামেনেইৰ পত্নীৰো মৃত্যু

ইজৰাইল আৰু আমেৰিকাৰ যৌথ আক্ৰমণত ইৰাণৰ সৰ্বোচ্চ নেতা আয়াতুল্লাহ আলী খামেনেইৰ সমগ্ৰ পৰিয়ালটোৱে শেষ হৈ গ’ল। সোমবাৰে আলী খামেনেইৰ পত্নী মনছুৰেহ খোজাষ্টে বাঘেৰজাদেয়ে শেষ নিশ্বাস ত্যাগ কৰে।

ইৰাণৰ চৰকাৰী সংবাদ মাধ্যম ‘প্ৰেছ টিভি’ৰ বাতৰি অনুসৰি যোৱা শনিবাৰে আমেৰিকা আৰু ইজৰাইলৰ আক্ৰমণত মনছুৰেহ খোজাষ্টে বাঘৰজাদে গুৰুতৰভাৱে আহত হৈছিল। সোমবাৰে তেওঁৰ মৃত্যু হয়।

শনিবাৰে ইৰাণৰ তেহৰাণত থকা তেওঁৰ কাৰ্যালয়ত অনুষ্ঠিত হোৱা বৈঠকৰ সময়ত ইজৰাইলৰ আক্ৰমণত নিহত হয় সৰ্বোচ্চ নেতা আয়াতুল্লাহ আলী খামেনেই। এই আক্ৰমণত তেওঁৰ কন্যা, জোঁৱাই, নাতিনী, বোৱাৰী নিহত হয়।

খামেনেই আৰু মনছুৰৰ ছটা সন্তান। চাৰিজন পুত্ৰ আৰু দুগৰাকী কন্যা। মুস্তাফা, মোজতাবা, মাছৌদ, মেছাম, বুছৰা আৰু হোদা। ডাঙৰ পুত্ৰ মুস্তাফাও এজন ধৰ্মগুৰু। মোজতাবাও চিনাকি মুখ। ইৰাণ-ইৰাক যুদ্ধৰ সময়ত তেওঁ সশস্ত্ৰ বাহিনীত যোগদান কৰিছিল। এই আক্ৰমণত কোনগৰাকী কন্যাৰ মৃত্যু হৈছে সেয়া এতিয়াও জানিব পৰা হোৱা নাই।

দেওবাৰে পুৱা আমেৰিকাৰ ৰাষ্ট্ৰপতি ড’নাল্ড ট্ৰাম্পে খামেনেইৰ মৃত্যুৰ খবৰ নিশ্চিত কৰে। তাৰ পিছত ইৰাণৰ চৰকাৰী সংবাদ মাধ্যমেও এই তথ্য নিশ্চিত কৰে। ইজৰাইল আৰু আমেৰিকাৰ ‘লক্ষ্য’ আছিল খামেনেই। পৰিয়ালত কেৱল তেওঁৰ পত্নীয়েহে বাচি আছিল। তেওঁৱো সোমবাৰে শেষ নিশ্বাস ত্যাগ কৰে।

যোৱা শনিবাৰে পুৱা ইৰাণক আক্ৰমণ কৰিছিল ইজৰাইলে। আমেৰিকাইও তাত যোগদান কৰে। শনিবাৰে পুৱা ইজৰাইলে প্ৰথমবাৰৰ বাবে তেহৰাণত আক্ৰমণ কৰে। ইৰাণৰ সৰ্বোচ্চ নেতা আয়াতুল্লাহ আলী খামেনেইৰ কাৰ্যালয়ৰ সমীপত সংঘটিত হয় বিস্ফোৰণ।

পিছত ইৰাণৰ সংবাদ মাধ্যমে ইজৰাইলে সমগ্ৰ দেশখনক আক্ৰমণ কৰা বুলি প্ৰকাশ কৰে। প্ৰথমে দেশৰ প্ৰতিৰক্ষা বাহিনীয়ে এই আক্ৰমণ নিশ্চিত কৰে। পিছত প্ৰধানমন্ত্ৰী বেঞ্জামিন নেতানিয়াহু আৰু আমেৰিকাৰ ৰাষ্ট্ৰপতি ড’নাল্ড ট্ৰাম্পেও সামৰিক অভিযানৰ কথা ঘোষণা কৰে।

শনিবাৰে নিশা ইৰাণে কাটাৰৰ দোহাৰ ডুবাইৰ আবুধাবি আৰু চৌদি আৰৱৰ ৰিয়াদত ইটোৰ পিছত সিটোকৈ আক্ৰমণ চলাইছে। শনিবাৰে সন্ধিয়া ডুবাইৰ বুৰ্জ খলিফাৰ কাষত তীব্ৰ বিস্ফোৰণৰ শব্দ শুনা যায়। যাৰ বাবে কেইমিনিটমানৰ ভিতৰতে বুৰ্জ খলিফা খালী কৰা হয়। ক্ষেপণাস্ত্ৰৰ এটা অংশও পাম জুমেইৰাত খুন্দা মাৰি বিস্ফোৰণ ঘটে। অনিৰ্দিষ্ট কাললৈ বন্ধ কৰি দিয়া হৈছে ডুবাই আন্তঃৰাষ্ট্ৰীয় বিমানবন্দৰ।

ইজৰাইলে শনিবাৰে নিশা ইৰাণক আক্ৰমণ কৰাৰ পৰিকল্পনা কৰিছিল। কিন্তু ইজৰাইল আৰু আমেৰিকাই কিয় খৰখেদাকৈ পুৱা ৭ বজাত ইৰাণক আক্ৰমণ কৰিলে? অৱশেষত প্ৰকাশ পালে প্ৰকৃত কাৰণ। ইৰাণৰ সৰ্বোচ্চ নেতা আয়াতুল্লাহ আলী খামেনেইৰ গোপন তথ্য ইজৰাইলৰ ৰাষ্ট্ৰীয় চোৰাংচোৱা সংস্থাৰ হাতত পৰে।

আন্তঃৰাষ্ট্ৰীয় সংবাদ মাধ্যমৰ সূত্ৰ অনুসৰি শনিবাৰে পুৱা ৯:২৭ বজাত ৰাজধানী তেহৰাণত ধাৰাবাহিক বিস্ফোৰণ সংঘটিত হয়। সেই সময়ত ইৰাণৰ সৰ্বোচ্চ নেতা আয়াতুল্লাহ আলী খামেনেই তেওঁৰ কাৰ্যালয়ত কৰ্মৰত আছিল। তেওঁৱেই গোপনে এখন বৈঠক মাতিছিল। এই বৈঠকৰ বিষয়ে তথ্য তেওঁৰ ঘনিষ্ঠ সহযোগীসকলেহে জানিছিল।

জানিব পৰা মতে, পুৱা ৯ বজাত আলী খামেনেই তেহৰাণত এই বৈঠক অনুষ্ঠিত কৰাৰ কথা আছিল। সেই তথ্য ইজৰাইলৰ ৰাষ্ট্ৰীয় চোৰাংচোৱা সংস্থা মোছাদক ফাদিল কৰিছিল খামেনেইৰ এজন ঘনিষ্ঠ সহযোগীয়ে। নিশা হ’বলগীয়া আক্ৰমণটোৱে খামেনেইৰ গোপন ঘাটিটোৰ বিষয়ে তথ্য পোৱাৰ লগে লগে লগে লগে তেহৰাণক আক্ৰমণ কৰিবলৈ আৰম্ভ কৰে।