আত্মহত্যা কৰা টেট শিক্ষয়িত্ৰীৰ মাতৃয়ে বিচাৰিলে ন্যায়

আত্মহত্যা কৰা ধুবুৰীৰ এখন বিদ্যালয়ত কৰ্মৰত টেট শিক্ষয়িত্ৰীগৰাকীৰ পিতৃয়ে তেওঁৰ মৃতদেহ চমজি লোৱাৰ সময়তে শিক্ষয়িত্ৰীগৰাকীৰ মাতৃয়ে বিচাৰিলে ন্যায়।

দেওবাৰে ‘নৰ্থইষ্ট নাও’ৰ আগত আতহত্যা কৰা ধুবুৰী জিলাৰ বিলাসীপাৰা শিক্ষা খণ্ডৰ অধীনৰ ১০৩৪ ভেৰভেৰী নিম্ন প্ৰাথমিক বিদ্যালয়ৰ প্ৰধান শিক্ষয়িত্ৰীগৰাকীৰ মাতৃ মায়াৰাণী গুপ্তাই কয়, ‘’নৰেন্দ্ৰ মোদী নেতৃত্বাধীন চৰকাৰে পুৰুষ শাসিত সমাজত মহিলাসকলক নিৰাপত্তা দিয়াত সম্পূৰ্ণ ব্যৰ্থ হৈছে।‘’

শ্বাহ আলম আহমেদ নামৰ ব্যক্তিগৰাকীয়ে (যিজনক মূল অভিযুক্ত হিচাপে চিনাক্ত কৰা হৈছে) ছ’চিয়েল মিডিয়াৰ বিভিন্ন মঞ্চত তেওঁৰ কিছুমান আপত্তিজনক ফটোগ্ৰাফ ভাইৰেল কৰাৰ পাছতে যোৱা বৃহস্পতিবাৰে টেট উত্তীৰ্ণ শিক্ষয়িত্ৰীগৰাকীয়ে আত্মহত্যা কৰিছিল।

নিজৰ জ্যেষ্ঠ কন্যাৰ ন্যায় দাবী কৰি মায়াৰাণী গুপ্তাই কয়,‘’চৰকাৰে নিযুক্তি নীতি সলনি কৰিব লাগিব আৰু শিক্ষয়িত্ৰীসকলক তেওঁলোকৰ গৃহ জিলাত নিযুক্তি দিব লাগে যাতে আন কোনো শিক্ষয়িত্ৰীয়ে তেওঁলোকৰ জীৱন শেষ কৰি দিবলৈ বাধ্য নহয়।‘’

উল্লেখযোগ্য যে শিক্ষয়িত্ৰীগৰাকী তিনিচুকীয়াৰ আছিল। ইয়াৰ মাজতে ধুবুৰী আৰক্ষীয়ে শ্বাহ আলম আহমেদক শিক্ষয়িত্ৰী গৰাকীক আত্মহত্যা কৰিবলৈ বাধ্য কৰাৰ অভিযোগত গ্ৰেপ্তাৰ কৰে আৰু জেললৈ প্ৰেৰণ কৰে।

বিলাসীপাৰা আৰক্ষী থানাত ভাৰতীয় দণ্ডবিধিৰ ৩০৬ ধাৰাৰ অধীনত ৮৬/২০১৯ নম্বৰৰ এটা গোচৰ পঞ্জীয়ন কৰা হৈছে আৰু ঘটনাটো সন্দৰ্বত তদন্ত অব্যাহ ৰখা হৈছে।

আশ্চৰ্যজনকভাৱে, যেতিয়া শিক্ষয়িত্ৰীগৰাকীৰ মাতৃ মায়াৰাণী গুপ্তাই উত্তৰাখণ্ডৰ ডেৰাদুনৰ পৰা আহিবলগীয়া তেওঁৰ পুত্ৰৰ বাবে বিলাসীপাৰা চহৰত অপেক্ষা কৰি আছিল, শিক্ষয়িত্ৰীগৰাকীৰ পিতৃ শিৱ প্ৰসাদ গুপ্তাই শনিবাৰে গধূলি ধুবুৰী হাস্পাতলত উপস্থিত হৈ শিক্ষয়িত্ৰীগৰাকীৰ মৃতদেহটো চমজি লয়।

তেওঁ শনিবাৰে ৰাতিপুৱাৰে পৰা বিলাসীপাৰাৰ এটি ল’জত থকা পত্নী মায়াৰাণী গুপ্তাক একো নজনোৱাকৈ মৃতদেহটো লৈ নিজৰ গৃহ জিলা তিনিচুকীয়ালৈ উভতি যায়।

আনহাতে, মৃত শিক্ষয়িত্ৰীগৰাকীৰ মাতৃগৰাকীয়ে বিলাসীপাৰা চহৰত দেওবাৰে ৰাতিপুৱা সংবাদ মাধ্যমৰ ব্যক্তিৰ আগত অভিযোগ কৰি কয় যে তেওঁৰ কন্যাই গৃহ জিলা তিনিচুকীয়ালৈ বদলিৰ বাবে আবেদন কৰিছিল, কিন্তু সংশ্লিষ্ট বিভাগে বিষয়টোত কোনো গুৰুত্ব নিদিলে।

বিলাসীপাৰা প্ৰাথমিক শিক্ষা বিষয়া মনোজ কুমাৰ ফুকনক যোগাযোগ কৰাত তেওঁ জানিবলৈ দিয়ে যে শিক্ষয়িত্ৰীগৰাকীয়ে বদলিৰ বাবে কেতিয়াও আবেদন কৰা নাছিল।