আই পি এলত খেলুৱৈৰ নিলাম সন্দৰ্ভত দিল্লী উচ্চ ন্যায়ালয়ৰ গুৰুত্বপূৰ্ণ ৰায়

দিল্লী উচ্চ ন্যায়ালয়ে আজি ভাৰতীয় ক্ৰিকেট নিয়ন্ত্ৰণ বোৰ্ড আৰু ইণ্ডিয়ান প্ৰিমিয়াৰ লীগ চমুকৈ আই পি এলৰ বিৰুদ্ধে দাখিল কৰা এখন ৰাজহুৱা স্বাৰ্থ জড়িত আবেদন খাৰিজ কৰে।

ৰাজহুৱা স্বাৰ্থ জড়িত আবেদনখনত ইণ্ডিয়ান প্ৰমিয়াৰ লীগত হোৱা খেলুৱৈৰ নিলাম প্ৰক্ৰিয়াক অবৈধ  আৰু ইয়াক বন্ধ কৰিব লাগে বুলি উল্লেখ কৰা হৈছিল।

উল্লেখযোগ্য যে, ভাৰতীয় ক্ৰিকেট নিয়ন্ত্ৰণ বোৰ্ডৰ অধীনত প্ৰতিবছৰে টি-২০ ফৰমেটত ইণ্ডিয়ান প্ৰিমিয়াৰ লীগ অনুষ্ঠিত হৈ আহিছে।

প্ৰতিযোগিতাখনৰ মূল খেল আৰম্ভ হোৱাৰ পূৰ্বে অনুষ্ঠিত হোৱা খেলুৱৈৰ নিলামত অংশগ্ৰহণকাৰী দল সমূহে বিভিন্ন খেলুৱৈক নিলামত স্থিৰ হোৱা মূল্যৰ বিনিময়ত তেওঁলোকৰ দলৰ হৈ খেলিবলৈ ক্ৰয় কৰে।

এই ক্ষেত্ৰত নিলামত অংশলোৱা খেলুৱৈগৰাকীয়ে তেওঁৰ এটা ভিত্তি মূল্য নিজে স্থিৰ কৰি দিয়ে যাৰ আধাৰত তেওঁৰ দৰ-দাম কৰা হয়।

চলিত বৰ্ষত ৰাজস্থান ৰোয়েলছে নিলামত অসমৰ যুৱ ক্ৰিকেটাৰ ৰিয়ান পৰাগক ক্ৰয় কৰিছিল। ইয়াৰ আগতে আবু নাছিম আহমেদেও মুম্বাই ইণ্ডিয়ানছৰ হৈ আই পি এলত ভাগ লৈছিল।

উল্লেখযোগ্য যে, ২০০৮ চনত প্ৰথমবাৰৰ বাবে আৰম্ভ হোৱা আই পি এল ক্ৰিকেট প্ৰতিযোগিতাখনে চলিত বৰ্ষত দ্বাদশ সংস্কৰণ সম্পূৰ্ণ কৰে।

২০১৯ বৰ্ষৰ আই পি এলত ৰোহিত শৰ্মা নেতৃত্বাধীন মুম্বাই ইণ্ডিয়ানছে চেম্পিয়ন হৈ অভিলেখ সংখ্যক চতুৰ্থ বাৰৰ বাবে প্ৰতিযোগিতাখনত বিজয়ী হোৱাৰ গৌৰৱ অৰ্জন কৰে।