জামিয়া মিলিয়া ইছলামিয়া বিশ্ববিদ্যালয়ৰ উপাচাৰ্য নিযুক্তিত অনিয়মৰ অভিযোগ
দিল্লী উচ্চ ন্যায়ালয়ে জামিয়া মিলিয়া ইছলামিয়া বিশ্ববিদ্যালয়ৰ উপাচাৰ্য নিযুক্তিৰ আইনগত বৈধতাক প্ৰত্যাহ্বান জনাই দাখিল কৰা এক আবেদনৰ ভিত্তিত কেন্দ্ৰীয় চৰকাৰ, জামিয়া মিলিয়া ইছলামিয়া বিশ্ববিদ্যালয়লৈ এক জাননী জাৰি কৰিছে। আবেদনখনত অনুসন্ধান সমিতিৰ অনিয়মিত গঠন, সমিতিৰ অধ্যক্ষৰ অনুপযুক্ত নিযুক্তিকে আদি কৰি কেইবাটাও অনিয়মৰ অভিযোগ উত্থাপন কৰা হৈছে।
অভিযোগ অনুসৰি, কেন্দ্ৰীয় শিক্ষা মন্ত্ৰণালয়ে ৰাষ্ট্ৰপতি ক সমিতিৰ অধ্যক্ষ নিৰ্বাচনত হস্তক্ষেপ কৰি মন্ত্ৰণালয়ে দিয়া দুগৰাকী মনোনীত ব্যক্তিৰ মাজৰ পৰা বাছনি কৰিবলৈ পৰামৰ্শ দিছিল। ইয়াৰোপৰি, আবেদনত উল্লেখ কৰা হৈছে যে উপাচাৰ্যৰ নিযুক্তি প্ৰক্ৰিয়াত শিক্ষা মন্ত্ৰণালয়ৰ হস্তক্ষেপে সংবিধানৰ বিধান আৰু সুপ্ৰীম কোৰ্টৰ নীতিসমূহ উলংঘা কৰিছে।
বিশ্ববিদ্যালয়ৰ পক্ষৰ অতিৰিক্ত সলিচিটৰ জেনেৰেল চেতন শৰ্মা আৰু কেন্দ্ৰীয় চৰকাৰৰ ষ্টেণ্ডিং কাউন্সেল মনিকা অৰোৰাই ৱ্ৰিট পিটিছনটোৰ গ্ৰাহ্যতাৰ ওপৰত প্ৰশ্ন উত্থাপন কৰি আবেদনকাৰীৰ আইনগত অধিকাৰ আৰু ব্যৱহাৰক প্ৰত্যাহ্বান কৰিছে। তেওঁলোকে ৰাষ্ট্ৰপতিক প্ৰদান কৰা চামাৰী নোটছৰ উল্লেখ কৰি এই নথিপত্ৰবোৰ আবেদনকাৰীৰ হাতলৈ কেনেকৈ পালেগৈ আৰু ইয়াৰ সত্যতাৰ প্ৰমাণ বিচাৰিছে। অৰোৰাই সংবিধানৰ অনুচ্ছেদ ৭৪(২)উদ্ধৃতি দাঙিধৰি কৰি ৰাষ্ট্ৰপতিক দিয়া মন্ত্ৰণালয়ৰ পৰামৰ্শৰ বিৰুদ্ধে ন্যায়িক পৰীক্ষা নিষিদ্ধ বুলি উল্লেখ কৰিছে।
আবেদনকাৰীৰ পক্ষৰ ড॰ অমিত জৰ্জে যুক্তি দৰ্শাই কয় যে যিকোনো নাগৰিকে ৰাজহুৱা স্বাৰ্থত আবেদন দাখিল কৰিব পাৰে আৰু উল্লিখিত নথিপত্ৰবোৰ বাতৰি, ওৱেবছাইটত সাৰ্বজনীনভাৱে উপলব্ধ আছিল।
ন্যায়াধীশ প্ৰতীক জালানে সকলো পক্ষক জাননী জাৰি কৰি ১৬ জুলাইত পৰৱৰ্তী শুনানিৰ দিন ধাৰ্য্য কৰিছে। উল্লেখ্য যে আবেদনখনত দাবী কৰা হৈছে যে প্ৰফেচৰ আছিফৰ নিযুক্তিত জামিয়া মিলিয়া ইছলামিয়া আইন ১৯৮৮ আৰু ইউজিচি নিয়মাৱলী ২০১৮ৰ বিধান উলংঘা কৰা হৈছে আৰু ইয়াক সংবিধানৰ অনুচ্ছেদ ২২৬ৰ অধীনত বাতিল কৰিব লাগে বুলি দাবী উত্থাপন কৰিছে।