গেৰুৱা বসন পিন্ধিব প্ৰাক্তন আটছা নেতা ধীৰাজ গোৱালাই…
এইবাৰ গেৰুৱা বসন পিন্ধিবলৈ সাজু চাহ জনজাতি ছাত্ৰ সংস্থা (আটছা)ৰ প্ৰাক্তন সভাপতি ধীৰাজ গোৱালা। শীঘ্ৰেই ভাৰতীয় জনতা পাৰ্টিত যোগদান কৰিব বুলি জানিব পৰা গৈছে। সূত্ৰ অনুসৰি নৱেম্বৰ মাহৰ ভিতৰত সহস্ৰাধিক সমৰ্থকৰ সৈতে গোৱালাৰ বিজেপিত যোগদান প্ৰায় নিশ্চিত বুলি জানিব পৰা গৈছে।
প্ৰকাশিত তথ্য অনুসৰি ২০২৬ৰ বিধানসভা নিৰ্বাচনত তিতাবৰ সমষ্টিৰ পৰা বিজেপিৰ প্ৰাৰ্থী হিচাপে প্ৰতিদ্বন্দ্বিতা কৰাৰ পৰিকল্পনা কৰিছে গোৱালাই। তিতাবৰ প্ৰয়াত মুখ্যমন্ত্ৰী তৰুণ গগৈৰ নেতৃত্বত কংগ্ৰেছৰ শক্তিশালী ঘাঁটি হিচাপে গঢ়ি উঠিছিল। সেয়ে এইবাৰ বিৰোধী দলসমূহক প্ৰতিহত কৰিবৰ বাবে গোৱালাই বিজেপিত যোগদানৰ যো-জা চলাইছে।
দেওবাৰে নিশা তিতাবৰৰ চাহ জনজাতি ছাত্ৰাৱাসত গোৱালাই মন্ত্ৰী পীযুষ হাজৰীকা আৰু কেন্দ্ৰীয় মন্ত্ৰী পবিত্ৰ মাৰ্ঘেৰিটাৰ সৈতে বৈঠকত মিলিত হয়। এই বৈঠকে তেওঁৰ বিজেপিত যোগদানৰ সম্ভাৱনাক দৃঢ় কৰি তুলিছে।
উল্লেখ্য যে শেহতীয়াকৈ সমষ্টি পুনৰ নিৰ্ধাৰণৰ ফলত তিতাবৰত চাহ জনগোষ্ঠীৰ ভোটাৰৰ সংখ্যা বৃদ্ধি পোৱাৰ বাবে ধীৰাজ গোৱালা ৰাজনৈতিক চৰ্চাৰ কেন্দ্ৰবিন্দু হৈ পৰিছে।
বৈঠক সন্দৰ্ভত গোৱালাই কয় যে, আটছাৰ নীতি-নিয়ম পূৰণ হ’লে মই সিদ্ধান্ত ল’ম আৰু সংবাদ মাধ্যমক প্ৰথমে জনাম। আমি মন্ত্ৰী দুজনৰ সৈতে চাহ জনগোষ্ঠীৰ সমস্যাৰ বিষয়ে আলোচনা কৰি কেইবাখনো স্মাৰকপত্ৰ প্ৰদান কৰিছো বুলি উল্লেখ কৰে যদিও তেওঁৰ মন্তব্যই বিজেপিত যোগদানৰ ইংগিত বহন কৰিছে।