১৫ দিনৰ সেনাৰ প্ৰশিক্ষণ লৈ কাশ্মীৰৰ পৰা উভতিল মহেন্দ্ৰ সিং ধোনী

ভাৰতীয় ক্ৰিকেট দলৰ প্ৰাক্তন অধিনায়ক মহেন্দ্ৰ সিং ধোনীয়ে কাশ্মীৰৰ পৰা তেওঁৰ ১৫ দিনীয়া সেনাৰ প্ৰশিক্ষণ লৈ উভতি আহিছে।

ধোনীয়ে ৩১ জুলাইৰ পৰা ১৫ আগষ্টলৈকে কাশ্মীৰত প্ৰশিক্ষণৰ বাবে আছিল।

তেওঁৰ প্ৰশিক্ষণৰ সময়ছোৱাত ধোনীয়ে শ্ৰীনগৰ, কুপবাড়া, উৰি আৰু লেহত সেনাৰ সৈতে আছিল।

প্ৰশিক্ষণৰ সময়ত ধোনীয়ে এজন সেনা জোৱানৰ দৰে পুৱাৰ পেৰেডৰ পৰা আৰম্ভ কৰি কাৰ্যালয়ৰ কৰ্তব্য, অস্ত্ৰ চালনাৰ প্ৰশিক্ষণ আৰু সন্ধিয়া খেলা-ধূলাত ভাগ লৈছিল।

১০৬ টেৰিটৰিয়েল আৰ্মি বেটেলিয়ন (পেৰা)ৰ অংশ হিচাপে থকা মহেন্দ্ৰ সিং ধোনীক প্ৰশিক্ষণৰ সময়ত তহলদাৰী সেনা, গাৰ্ড আৰু কৰ্তব্য সমাপনৰ পাছৰ কাম আদিত ব্যস্ত থকা দেখা গৈছিল।

ধোনীয়ে তেওঁৰ ১৫ দিনীয়া প্ৰশিক্ষণত কোনো নিয়মীয়া বিষয়াৰ দৰে কাম কৰা দেখা যায়।

তেওঁৰ জোতা পলিচ কৰি থকা ফটো বহুত ভাইৰেল হৈ পৰা দেখা গৈছিল।

ইয়াৰ মাজতে কেন্দ্ৰীয় চৰকাৰে জম্মু-কাশ্মীৰত ধাৰা ৩৭০ৰ অধীনত লাভ কৰি থকা বিশেষ ৰাজ্যৰ মৰ্যাদা প্ৰত্যাহাৰ কৰি দুখন কেন্দ্ৰীয় শাসিত অঞ্চলত বিভক্ত কৰে।

জম্মু-কাশ্মীৰ আৰু লাডাখক দুখন সুকীয়া কেন্দ্ৰীয় শাসিত প্ৰদেশ ঘোষণা কৰা হয়।

নতুন কেন্দ্ৰীয় শাসিত প্ৰদেশ দুখনত প্ৰথমবাৰৰ বাবে স্বাধীনতা দিৱস পালন কৰা হয়। মহেন্দ্ৰ সিং ধোনীয়ে লাডাখত স্বাধীনতা দিৱস পালন কৰে।

লাডাখত তেওঁ সেনাৰ হাস্পাতললৈ গৈ ৰোগীসকলৰ সৈতে বাৰ্তালাপো কৰে।

উল্লেখযোগ্য যে ধোনী প্ৰাদেশিক সেনাৰ লেফটেনেন্ট কৰ্ণেলৰ পদ মৰ্যাদা লাভ কৰিছে।

ধোনীয়ে পেৰাছ্যুট ৰেজিমেন্টত দুমাহৰ বাবে সময় দিবলৈ ক্ৰিকেট বোৰ্ডৰ পৰা বিৰতিৰ অনুমতি লৈছিল।