১২,৪০০ কোটিৰ মালিক, আৰু টকা লাগে? পান মছলাৰ বিজ্ঞাপনক লৈ শ্বাহৰুখক কটাক্ষ ধ্ৰুৱ ৰাথীৰ

প্ৰধানমন্ত্ৰী নৰেন্দ্ৰ মোডী আৰু গেৰুৱা শিবিৰৰ বিৰোধিতা কৰি বহুবাৰ বাতৰিৰ শিৰোনাম দখল কৰিছে জনপ্ৰিয় ইউটিউবাৰ ধ্ৰুৱ ৰাথীয়ে। এইবাৰ তেওঁৰ টাৰ্গেট বলীউডৰ ছুপাৰষ্টাৰ শ্বাহৰুখ খান। ইউটিউবাৰ ধ্ৰুৱ ৰাথীয়ে এটা ভিডিঅ’ শ্বেয়াৰ কৰি অনলাইনত নতুন বিতৰ্কৰ সৃষ্টি কৰিছে।

বুধবাৰে এক্স-এ (পূৰ্বৰ টুইটাৰ)ত এটা পোষ্টত ধ্ৰুৱে জোৱানৰ অভিনেতা শ্বাহৰুখ এতিয়া বিশ্বৰ ধনী অভিনেতাসকলৰ ভিতৰত অন্যতম বুলি প্ৰকাশ পোৱা বাতৰিৰ বিষয়ে আলোচনা কৰে। কিং খানৰ সম্পত্তিৰ পৰিমাণ প্ৰায় ১.৪ বিলিয়ন ডলাৰ (প্ৰায় ১২,৪০০ কোটি টকা)। শ্বাহৰুখে পান মছলাৰ বিজ্ঞাপন দিয়াৰ প্ৰয়োজনীয়তাক লৈ প্ৰশ্ন উত্থাপন কৰে ধ্ৰুৱে।

ভিডিঅ’টোত ইণ্টাৰনেটৰ প্ৰভাৱশালী ব্যক্তিগৰাকীয়ে কয়, ‘শ্বাহৰুখ খান এতিয়া কোটিপতি। তেওঁৰ বৰ্তমানৰ সম্পত্তিৰ পৰিমাণ ১২.৪ বিলিয়ন ডলাৰ, অৰ্থাৎ টম ক্ৰুজৰ দৰে হলিউডৰ তাৰকাতকৈ তেওঁ অধিক ধনী। টকাৰ ফালৰ পৰা সেই ধন কিমান জানেনে? ১২,৪০০ কোটি টকা। কিমান টকা আপুনি জানেনে? কল্পনা কৰাটোও কঠিন।

যদি এই ধন বেংকত মাত্ৰ ৭% সুতত ৰখা হয়, তেন্তে আপুনি কিমান সুত উপাৰ্জন কৰিব পাৰে? সেই সম্পত্তিৰ ৫০০ কোটি টকা। শ্বাহৰুখে ইচ্ছা কৰিলেও নিজৰ ধন খৰচ কৰিব নোৱাৰে। বিলাসী জীৱন যাপন কৰি যিমান বিচাৰে সিমান সম্পত্তি কিনাৰ পাছতো কোটিপতি শ্বাহৰুখৰ ধন শেষ নহ’ব৷ তথাপি পান মছলাৰ দৰে ক্ষতিকাৰক ব্ৰেণ্ডৰ মুখ কিয় শ্বাহৰুখ? ধ্ৰুৱৰ প্ৰশ্ন।

তেওঁ কঠোৰ ভাষাত কয়, ‘শ্বাহৰুখ খানৰ ওচৰত মোৰ প্ৰশ্নটো হ’ল, ইমান টকা যথেষ্ট নহয়নে? যদি হয়, তেন্তে পান মছলাৰ দৰে ক্ষতিকাৰক কিবা এটাৰ প্ৰচাৰ কৰিবলৈ কিহে বাধ্য কৰে?’ ধ্ৰুৱে এনে বিজ্ঞাপনৰ বাবে এজন ছুপাৰষ্টাৰে কিমান টকা পাব পাৰে সেই কথাও উল্লেখ কৰে।

তেওঁ কয় যে ১০ বছৰ আগতে শ্বাহৰুখে এই বিজ্ঞাপনৰ বাবে ১০ কোটি লাভ কৰিলেহেঁতেন, আজি হয়তো ১০ গুণ বেছি পাব। ১০০ কোটি টকা, কিন্তু প্ৰশ্ন হয় শ্বাহৰুখ খানক সঁচাকৈয়ে এই অতিৰিক্ত ১০০-২০০ কোটিৰ প্ৰয়োজন নেকি? নিজৰ ভিতৰলৈ চাওক আৰু নিজকে সৎভাৱে সুধিব। ইমান ধন-সম্পত্তিৰে আপুনি কি কৰিব? এতিয়া আন এটা দৃষ্টিকোণৰ পৰা ভাবি চাওক, দেশৰ শীৰ্ষ অভিনেতাই যদি এনে ক্ষতিকাৰক সামগ্ৰীৰ প্ৰচাৰ বন্ধ কৰে তেন্তে জাতিটোৰ ওপৰত ইয়াৰ কেনে প্ৰভাৱ পৰিব পাৰে?

এই ভিডিঅ’টো যাতে শ্বাহৰুখৰ ওচৰলৈ যায় তাৰ বাবে অনুগামীসকলক বাৰ্তা বিয়পাই দিবলৈ আহ্বান জনাই ভিডিঅ’টোৰ অন্ত পেলায়। প্ৰসংগক্ৰমে বৰ্তমান শ্বাহৰুখ খান যি পান মছলা ব্ৰেণ্ডৰ প্ৰচাৰৰ মুখ, অক্ষয় কুমাৰেও এসময়ত সেই ব্ৰেণ্ডৰ বাবে প্ৰচাৰ চলাইছিল। অৱশ্যে পিছত অক্ষয়ে ক্ষমা খুজি সেই বিজ্ঞাপনৰ পৰা নিজকে আঁতৰাই আনে।