ক্ষীৰোদ বৰুৱা স্মাৰক আন্তঃজিলা ফুটবল চেম্পিয়নশ্বিপত ডিব্ৰুগড় শ্ৰেষ্ঠ

ওদালগুৰি জিলাৰ ভেৰগাঁৱত অনুষ্ঠিত ক্ষীৰোদ বৰুৱা স্মাৰক ৬৭ সংখ্যক আন্তঃজিলা ছিনিওৰ ফুটবল চেম্পিয়নশ্বিপৰ আজিৰ ফাইনেলত ডিব্ৰুগড় জিলা ক্ৰীড়া সংস্থাই তিনিচুকীয়াৰ ফুটবল দলক ১-০ গ’লত পৰাস্ত কৰি বিজয়ীৰ খিতাপ অৰ্জন কৰে।

ভেৰগাঁও উচ্চ মাধ্যমিক বিদ্যালয়ৰ খেলপথাৰত অনুষ্ঠিত তীব্ৰ প্ৰত্যাহ্বানপূৰ্ণ খেলখনৰ অন্তিম ৩ মিনিটত ডিব্ৰুগড়ৰ হৈ মিলন বসুমতাৰিয়ে পেনাল্টি কিকৰ জৰিয়তে খেলখনৰ একমাত্ৰ গ’লটো দিয়ে।

আনহাতে ইয়াৰ পূৰ্বে ৭৭ মিনিটত ৰে’ড কাৰ্ড পোৱাৰ বাবে বিজয়ী দলৰ ফিৰুডন বাগলাৰি খেলপথাৰৰ পৰা বাহিৰ হ’বলগীয়া হৈছিল।

প্ৰতিযোগিতাৰ বিজয়ী দল ডিব্ৰুগড়ে ক্ষীৰোদ বৰুৱা বঁটাৰ লগতে নগদ ১৫,০০০ হাজাৰ টকা লাভ কৰাৰ বিপৰীতে তিনিচুকীয়াৰ দলটোৱে ৰানাৰ্ছ আপ বঁটাৰ তথা নগদ ১০,০০০ টকা লাভ কৰে।