নাগৰিকত্ব সংশোধনী বিধেয়কৰ বিৰোধিতাৰে হাফলঙত হিলছ ট্ৰাইবৰ প্ৰতিবাদী ধৰ্ণা

নাগৰিকত্ব সংশোধনী বিধেয়কৰ বিৰোধিতাৰে কংগ্ৰেছৰ পাছত এইবাৰ হিলছ্ ট্ৰাইব ষ্টুডেন্ট এছ’চিয়েছনৰ ধৰ্ণাত উত্তাল হৈ পৰিছে ডিমা হাচাও জিলা উপায়ুক্ত কাৰ্যালয়ৰ চৌহদ।

কোনো কাৰণতে এই বিল আইনত পৰিণত হ’বলৈ নিদিও বুলি হুংকাৰ দিছে হিলছ্ ট্ৰাইব ষ্টুডেন্ট এছ’চিয়েছনৰ সভাপতি প্ৰমিত চেঙগুইনে।

বুধবাৰে হাফলঙত অনুষ্ঠিত ধৰ্ণাত চেঙগুইনে কয় যে কেন্দ্ৰীয় চৰকাৰে দেশৰ আন আন ৰাজ্যৰ লগতে অসমৰ ষষ্ঠ অনুসূচিৰ ডিমা হাচাও জিলাতো যদি এই বিল জাপি দিয়াৰ সিদ্ধান্ত লৈছে, তেন্তে অনতি পলমে এয়া বাতিল কৰিব লাগে। অন্যথা বৃহত্তৰ আন্দোলন গঢ়ি তোলা হ’ব আৰু তাৰ বাবে চৰকাৰ দায়ী হ’ব বুলি মন্তব্য কৰে।

ধৰ্ণা কাৰ্যসূচীৰ পিছতে প্ৰতিবাদকাৰী সকলে ডিমা হাচাও জিলাৰ উপায়ুক্ত অমিতাভ ৰাজখোৱাক সাক্ষাৎ কৰি প্ৰধান মন্ত্ৰীৰ উদ্দেশ্যে এখন স্মাৰক পত্ৰ প্ৰেৰণ কৰাৰ বুলিও জনায়।

উল্লেখনীয় যে যোৱা সোমবাৰৰ পৰা সংসদৰ শীতকালীন অধিবেশন আৰম্ভ হৈছে আৰু কেন্দ্ৰীয়  চৰকাৰে এই অধিবেশনতে সদনত নাগৰিকত্ব বিল আনিবৰ কাৰণে সম্পূৰ্ণভাৱে প্ৰস্তুত হৈছে। প্ৰাপ্ত তথ্য অনুসৰি সংসদৰ কাৰ্যক্ৰমনিকাৰ ১৬ নম্বৰত আছে নাগৰিকত্ব সংশোধনী বিধেয়ক।

ইপিনে চৰকাৰে ষষ্ঠ অনুসূচিৰ ডিমা হাচাও জিলাত পঞ্চায়তী ৰাজ ব্যৱস্থা চালু কৰাৰ লগতে প্ৰস্তাৱিত ডিটেনচন ক্যাম্প স্থাপন কৰাৰ সিদ্ধান্ত বাতিল কৰিবলৈ হুংকৰা প্ৰদান কৰে হিলছ্ ট্ৰাইব এছ’চিয়েছনে।

হিলছ্ ট্ৰাইব ষ্টুডেণ্ট গোটৰ সভাপতি আৰু ডিমাচা ষ্টুডেণ্ট য়ুনিয়নৰ কেন্দ্ৰীয় কমিটিৰ সম্পাদক প্ৰমিত চেঙগুইনে কয়, ‘অবৈধ বিদেশীৰ বোজা আমি ল’ব নোৱাৰো। কিয়নো ডিমা হাচাও কোনো ডাম্পিং গ্ৰাউণ্ড নহয়’।

ইয়াৰ উপৰি প্ৰস্তাৱিত ডিটেনশ্যন কেম্প স্থাপন কৰা প্ৰসংগটো চৰকাৰক সমালোচনা কৰে তেওঁ কয় ‘চৰকাৰে ডিমা হাচাওত পলিটেকনিক, মেডিকেল কলেজ, ইঞ্জিনিয়াৰিং কলেজকে ধৰি আছাম য়ুনিভাৰ্চিটি কেম্পাছ স্থাপন কৰিবলৈ সক্ষম হোৱা নাই। কিন্তু বিদেশীক ৰখাৰ কাৰণে ডিটেনশ্যন কেম্প স্থাপন কৰাৰ কাৰণে উঠি পৰি লগা পৰিলক্ষিত হৈছে। যি অত্যন্ত দুৰ্ভাগ্যজনক বিষয়’।

লগতে ডিমা হাচাও জিলাত পঞ্চায়তী ৰাজ ব্যৱস্থা চালু নকৰিবলৈও হুংকাৰ প্ৰদান কৰে ষ্টুডেন্ট এছ’চিয়েছনে।