অভিযান্ত্ৰিক কলেজত ছাত্ৰ-ছাত্ৰী যোগানৰ নামত ধন সংগ্ৰহ কৰা দুই প্ৰবঞ্চকক আটক দিচপুৰ আৰক্ষীৰ

শনিবাৰ অৰ্থাৎ ৮ ছেপ্টেম্বৰৰ নিশা মহানগৰৰ দিচপুৰ আৰক্ষীয়ে এক অভিযান চলাই ছুলেমান আলী আৰু নিজামুদ্দিন আলী নামৰ ২ প্ৰৱঞ্চকক আটক কৰিবলৈ সক্ষম হয়।

এই ধৃত দুই প্ৰৱঞ্চক ক্ৰমে নিজামুদ্দিনৰ ঘৰ কৰিমগঞ্জ আৰু চুলেমানৰ ঘৰ বৰপেটাৰ কলগছিয়াত বুলি আৰক্ষীৰ সূত্ৰৰ পৰা জানিব পৰা গৈছে।

উল্লেখযোগ্য যে দক্ষিণ ভাৰতৰ দুখন অভিযান্ত্ৰিক মহাবিদ্যালয়ত উত্তৰ পূবৰ বিশেষকৈ নাগালেণ্ড, মণিপুৰ, মেঘালয়ৰ বিজ্ঞান শাখাৰ ছাত্ৰ-ছাত্ৰীক যোগান ধৰাৰ নামত দক্ষিণ ভাৰতৰ দুখন অভিযান্ত্ৰিক কলেজৰ পৰা ধন আত্মসাত্‍ কৰাৰ অভিযোগ উত্থাপিত হৈছিল এই দুই প্ৰৱঞ্চকৰ বিৰুদ্ধে।

দিচপুৰ আৰক্ষীয়ে নৰ্থ ইষ্ট নাওক জনোৱা অনুসৰি তামিলনাডুৰ পি আণ্ট’ নামৰ এজন লোকৰ পৰা ইঞ্জিনিয়াৰিঙৰ ছাত্ৰ যোগান ধৰিম বুলি ধৃত দুই প্ৰবঞ্চকে ৫ লাখ টকা দাবী কৰে।

আৰু দাবী কৰা ধন নিবলৈ আহি শনিবাৰে বিয়লি প্ৰায় ৫:৩০ বজাত হাতে-লোটে গ্ৰেপ্তাৰ হ’ল প্ৰৱঞ্চক দুটা।

দিচপুৰ আৰক্ষীয়ে জনোৱা অনুসৰি ধৃত প্ৰৱঞ্চক দুটাই পূৰ্বতে নাগালেণ্ড মণিপুৰৰ ছাত্ৰ-ছাত্ৰীৰ ভুৱা চাৰ্টিফিকেট দেখুৱাই দক্ষিণ ভাৰতৰ ৰাজাশ অভিযান্ত্ৰিক মহাবিদ্যালয় আৰু জয় মাডাহ অভিযান্ত্ৰিক মহাবিদ্যালয় কৰ্তৃপক্ষৰ পৰা ১৩৫ জন ছাত্ৰ যোগান ধৰিম বুলি আত্মসাত্‍ কৰিছিল ৫ লাখ ৩০ হাজাৰ টকা।

উল্লেখযোগ্য যে তামিলনাডুৰ (অসমৰ ধেমাজিত কৰ্মসূত্ৰে থকা) পি আন্টই ধৃত প্ৰৱঞ্চক দুটাৰ বিৰুদ্ধে অভিযোগ কৰাত দিচপুৰ আৰক্ষীয়ে ২৬৩৮/১৮ গোচৰ নম্বৰত আৰু ভাৰতীয় দণ্ডবিধিৰ ৪২০/৪০৬/৪৬৮/৪৭১/৩৪ ধাৰাত গোচৰ ৰুজু কৰি অভিযান চলাইছিল।