অৱশেষত আত্মসমৰ্পণ কৰিলে দিচপুৰ থানাৰ পলাতক উপ-পৰিদৰ্শক নিপু কলিতাই

সোণ সৰবৰাহকাৰীৰ পৰা বৃহৎ পৰিমাণৰ সোণ লুটি প্ৰায় এসপ্তাহৰ অধিক সময় পলাতক হৈ থকা দিচপুৰ থানাৰ উপ পৰিদৰ্শক নিপু কলিতাই বুধবাৰে বশিষ্ট থানাত আত্মসমৰ্পণ কৰে। লগে লগে তেওঁক আৰক্ষীয়ে গ্ৰেপ্তাৰ কৰি দিচপুৰ থানালৈ আনি সম্প্ৰতি জেৰা চলাই আছে।

উল্লেখযোগ্য যে ১৫ জানুৱাৰিত নংপোৰ গুৱাহাটী-শ্বিলং পথত অভিযান চলাই চোৰ সোণ সৰবৰাহকাৰীৰ পৰা প্ৰায় ৪ কোটি টকা মূল্যৰ ৬০ খন সোণৰ বিস্কুট জব্দ কৰি পাছত হৰলুকি কৰিছিল আৰক্ষী বিষয়াজনে। তেওঁক সংগ দিছিল হাবিলদাৰ ফাইজুৰ ৰহমান আৰু গৃহৰক্ষী জোৱান আফজল আলীয়ে।

আনহাতে নিপু কলিতাই আজি আত্মসমৰ্পণ কৰে যদিও আৰক্ষীয়ে এই পৰ্যন্ত হৰলুকি হোৱা সোণখিনি উদ্ধাৰ কৰিবলৈ সক্ষম হোৱা নাই। তদুপৰি তেওঁৰ তেওঁৰ সহযোগী হাবিলদাৰ আৰু গৃহৰক্ষী জোৱানজন বৰ্তমানেও পলাতক অৱস্থাতেই আছে।

অভিযানৰ নামত আৰক্ষীয়ে ডকাইতৰ ৰূপ লোৱা এই ঘটনাই মহানগৰীত চাঞ্চল্যৰ সৃষ্টি কৰিছিল।

পৰৱৰ্তী সময়ত যোৱা ৫ ফেব্ৰুৱাৰিত সোণ সৰবৰাহৰ লগত জড়িত ৱাহিদুৰ ৰহমান, ৱাহাজুদ্দিন ৰহমান আৰু আজমীৰ হুছেইন নামৰ তিনিজন সৰবৰাহকাৰীয়ে দিচপুৰ থানাত নিপু কলিতা আৰু সহযোগীকেইজনৰ বিৰূদ্ধে বৃহৎ পৰিমাণৰ সোণ হৰলুকি কৰা সন্দৰ্ভত ডকাইতিৰ গোচৰ দিয়াত এই ঘটনাটো পোহৰলৈ আহিছিল।

উক্ত দিনাৰ পৰাই পলাতক হৈ থকাৰ অন্তত আজি উপ পৰিদৰ্শক গৰাকীয়ে বশিষ্ট থানাত আত্মসমৰ্পণ কৰে।