‘৫২ চনতে স্থাপিত এখন বিদ্যালয়ত উচ্ছেদ চলাবলৈ অহাক লৈ শিৱসাগৰত প্ৰতিক্ৰিয়া

শিৱসাগৰ নগৰৰ মাজ মজিয়াৰ আমোলাপট্টীত অৱস্থিত এখন চৰকাৰী বিদ্যালয়। ১৯৫২ চনত স্থাপিত এইখন বিদ্যালয়ৰ নাম বিদ্যাপীঠ মধ্য ইংৰাজী বিদ্যালয়। দীৰ্ঘদিন ধৰি ভূমি বিবাদ চলি থকা এই বিদ্যালয়ত বুধবাৰে হঠাৎ আদালতৰ নিৰ্দেশত প্ৰশাসনে উচ্ছেদ চলাবলৈ অহাক কেন্দ্ৰ কৰি এক অপ্ৰীতিকৰ পৰিস্থিতিৰ সৃষ্টি হয়।

জানিব পৰা মতে নাজিৰাৰ সন্দিকৈ পৰিয়ালে এসময়ত এই বিদ্যালয়ৰ বাবে ২ কঠা ১৩ লোচা মাটি দান কৰিছিল। ১৯৭৭ চনত বিদ্যালয়খনে লাভ কৰিছিল চৰকাৰী মৰ্যদা। কিন্তু আজি হঠাৎ বিদ্যালয়খন উচ্ছেদ কৰিবলৈ জে চি বি লৈ প্ৰশাসনৰ লোক উপস্থিত হয়।

বিদ্যালয় পৰিদৰ্শকৰ উপস্থিতিত পাঠদান চলি থকাৰ সময়ত প্ৰশাসনে উচ্ছেদ কাৰ্য চলাবলৈ অহাত এক উত্তেজনাময় পৰিস্থিতিৰ সৃষ্টি হয়। অৱশ্যে জিলা উপায়ুক্তৰ চেষ্টাত আদালতলৈ এক আৱেদন দাখিল কৰাত বিদ্যালয়খনত উচ্ছেদ চলোৱা নহ’ল।

উল্লেখযোগ্য বিদ্যালয়ৰ মাটি দাতা পৰিয়ালৰ লোকে আজিৰ পৰা দহ বছৰৰ পূৰ্বে বিদ্যালয়ৰ মাটি পুনৰ বিচাৰি শিৱসাগৰ মুঞ্চিফ আদালতত এক গোচৰ তৰিছিল। দীৰ্ঘদিন ধৰি চলা গোচৰত বিদ্যালয়ৰ হৈ এজন অধিবক্তাই প্ৰতিনিধিত্ব কৰি আছিল যদিও তেওঁৰ মৃত্যুৰ পিছত বিদ্যালয়ৰ হৈ আদালতত কোনো উপস্থিত নোহোৱাত আদালতে গোচৰীয়াৰ হৈ ৰায়দান কৰে। আনহাতে বিদ্যালয় কৰ্তৃপক্ষই আদালতৰ পৰা উচ্ছেদ সম্পৰ্কীয় কোনো জাননী লাভ কৰা নাই বুলি কয়।