কৰ’নাৰ সংহাৰত দিশহাৰা আমেৰিকা; প্ৰধান মন্ত্ৰী মোদীৰ পৰা সহায় বিচাৰিলে ডোনাল্ড ট্ৰাম্পে

কৰ’না ভাইৰাছে গোটেই বিশ্বতে আতংকৰ সৃষ্টি কৰিছে। কৰ’না ভাইৰাছ আক্ৰান্তৰ সংখ্যা আমেৰিকাত আটাইতকৈ বেছি হৈছে আৰু দেশখনত নিৰন্তৰ কৰ’না সংক্ৰমণৰ ঘটনা বৃদ্ধি পাইছে।

ইয়াৰ মাজতে আমেৰিকাৰ ৰাষ্ট্ৰপতি ডোনাল্ড ট্ৰাম্পে ভাৰতৰ প্ৰধান মন্ত্ৰী নৰেন্দ্ৰ মোদীৰ পৰা সহায় বিচাৰিলে আৰু হাইড্ৰ’ক্সিক্লৰকুইন (hydroxychloroquine) টেবলেট যোগানৰ বাবে অনুৰোধ কৰে।

চীনৰ উহানৰ পৰা বিয়পি পৰা কৰ’না ভাইৰাছে আমেৰিকাত আটাইতকৈ অধিক লোকক সংক্ৰমিত কৰিছে।

দেশখনত কৰ’না ভাইৰাছত তিনি লাখতকৈয়ো অধিক লোক সংক্ৰমিত হৈছে আৰু ইয়াৰ ফলত প্ৰতিদিনে মৃত্যুৰ সংখ্যা বৃদ্ধি পাবলৈ লৈছে।

এনে পৰিস্থিতিৰ মাজতে আমেৰিকাৰ ৰাষ্ট্ৰপতি ডোনাল্ড ট্ৰাম্পে প্ৰধান মন্ত্ৰী মোদীৰ সৈতে কথা পাতিছে।

আমেৰিকাৰ ৰাষ্ট্ৰপতিগৰাকীয়ে কয় যে তেওঁ প্ৰধান মন্ত্ৰী মোদীক তেওঁ হাইড্ৰ’ক্সিক্লৰকুইন টেবলেট মুকলি কৰি দিয়াৰ বাবে অনুৰোধ কৰিছে। লগতে, মোদীক আমেৰিকাৰ হাইড্ৰ’ক্সিক্লৰকুইনৰ অৰ্ডাৰসমূহ জৰুৰীভাৱে মুকলি কৰি দিবলৈও অনুৰোধ কৰিছে।

ট্ৰাম্পে কয়,’’ভাৰতে বৃহৎ পৰিমানে এই দৰৱ তৈয়াৰ কৰে। ভাৰতৰ জনসংখ্যা ১০০কোটিতকৈয়ো অধিক। তেওঁক নিজৰ লোকসকলৰ বাবেও ইয়াৰ প্ৰয়োজন হ’ব। মই প্ৰধান মন্ত্ৰী মোদীক কৈছো যে তেওঁ আমাৰ অৰ্ডাৰসমূহ প্ৰেৰণ কৰিলে মই কৃতজ্ঞ হৈ ৰ’ম।‘’

উল্লেখযোগ্য যে কৰ’না আক্ৰান্ত ৰোগীৰ চিকিৎসাৰ বাবে হাইড্ৰ’ক্সিক্লৰকুইনৰ ব্যৱহাৰ কৰা হয়।

আমেৰিকাত বৰ্তমানলৈ কৰ’না ভাইৰাছৰ ফলত মৃত্যু হোৱা লোকৰ সংখ্যা ৮হাজাৰ অতিক্ৰম কৰিছে।