ইমান সংকীৰ্ণ মনোভাৱৰ নহ’ব: পাকিস্তানী শিল্পীক ভাৰতত নিষিদ্ধ কৰিবলৈ কৰা আবেদন খাৰিজ কৰি ভৰ্ৎসনা উচ্চতম ন্যায়ালয়ৰ

পাকিস্তানৰ কলা-কুশলীক ভাৰতত অনুষ্ঠান পৰিৱেশন বা কাম কৰাত সম্পূৰ্ণ নিষেধাজ্ঞা আৰোপ কৰিবলৈ আবেদন জনাই উচ্চতম ন্যায়ালয়ৰ ভৰ্ৎসনাৰ সন্মুখীন হৈছে এগৰাকী লোক।

এই আবেদন খাৰিজ কৰি দেশৰ শীৰ্ষ আদালতে আবেদনকাৰীক ইমান সংকীৰ্ণ মনোভাৱৰ নহ’বলৈ উপদেশ দিয়ে। ন্যায়াধীশ সঞ্জীৱ খান্না আৰু এছ ভি এন ভাট্টীৰ বিচাৰপীঠে শুনানি গ্ৰহণ কৰিছিল এই আবেদনৰ।

আদালতত এই আবিদন দাখিল কৰিছিল ফাইজ আনোৱাৰ কুৰেছি নামৰ এজন লোকে। কুৰেছিয়ে নিজকে চিনেমাৰ কৰ্মী আৰু শিল্পী বুলি উল্লেখ কৰে আবেদনখনত। ইতিপূৰ্বে একেটা উদ্দেশ্যতে দাখিল কৰা কুৰেছিৰ আবেদন নাকচ কৰিছিল বোম্বে আদালতে।

ন্যায়াধীশ সঞ্জীৱ খান্না আৰু এছ ভি এন ভাট্টীৰ বিচাৰপীঠে বোম্বে উচ্চ ন্যায়ালয়ৰ আদেশত হস্তক্ষেপ কৰিবলৈ অমান্তি প্ৰকাশ কৰি আবেদন খাৰিজ কৰে। আদালতে লগতে উচ্চ ন্যায়ালয়ে আবেদনকাৰীৰ বিৰুদ্ধে কৰা কিছুমান মন্তব্য পৰিহাৰৰ আবেদনো নাকচ কৰে।

প্ৰকাশিত খবৰ অনুসৰি, বোম্বে উচ্চ ন্যায়ালয়ে এই আবেদন খাৰিজ কৰি এই উদ্দেশ্যক সাংস্কৃতিক সম্প্ৰীতি, ঐক্য আৰু শান্তিৰ প্ৰসাৰৰ ক্ষেত্ৰত এক পশ্চাদগমন পদক্ষেপ বুলি অভিহিত কৰিছিল।

দেশপ্ৰেমিক হ’বলৈ বিদেশৰ পৰা অহা, বিশেষকৈ চুবুৰীয়া দেশৰ পৰা অহা লোকৰ প্ৰতি শত্ৰুতা আচৰণৰ কোনো প্ৰয়োজন নাই বুলিয়ো বোম্বে উচ্চ ন্যায়ালয়ে আদেশত উল্লেখ কৰিছিল।