উত্তৰ প্ৰদেশত ড° আম্বেদকাৰৰ মূৰ্তি লণ্ডভণ্ড, বিজেপি চৰকাৰক কঠোৰ সমালোচনা বিৰোধীৰ
যোৱা দেওবাৰে পুৱা উত্তৰ প্ৰদেশৰ গাজিয়াবাদ জিলাৰ লনীত এক অতি দুখজনক ঘটনা সংঘটিত হয়। কোনো অচিনাক্ত দুৰ্বৃত্তই ভাৰতীয় সংবিধানৰ খনিকৰ ড° বি. আৰ. আম্বেদকাৰৰ এখন প্ৰতিমূৰ্তি ভাঙি পেলায়। এই কাৰ্যৰ পিছতে সমগ্ৰ অঞ্চলটোত তীব্ৰ উত্তেজনাই বিৰাজ কৰে। অনুসূচিত জাতিৰ লোকসকলে এই কাৰ্যৰ তীব্ৰ বিৰোধিতা কৰি দোষীৰ বিৰুদ্ধে অতি সোনকালে কঠোৰ ব্যৱস্থা ল‘বলৈ দাবী জনাই প্ৰতিবাদ সাব্যস্ত কৰে। পিছত আৰক্ষীয়ে অভিযুক্তক গ্ৰেপ্তাৰ কৰাৰ আশ্বাস দিয়াৰ পিছতহে ৰাইজে প্ৰতিবাদ সামৰণি মাৰে।
গাজিয়াবাদৰ গ্ৰাম্য আৰক্ষী অধীক্ষক সুৰেন্দ্ৰ নাথ তিৱাৰীয়ে এই ঘটনাৰ বিষয়ে উল্লেখ কৰি কয় যে আৰক্ষীয়ে ইতিমধ্যে এখন গোচৰ ৰুজু কৰিছে আৰু দোষীক কৰায়ত্ব কৰিবলৈ এটা বিশেষ দল গঠন কৰিছে। তদন্তৰ স্বাৰ্থত কেইবাজনো সন্দেহযুক্ত লোকক আটক কৰি সোধা-পোছা কৰা হৈছে। ইয়াৰ লগতে আৰক্ষীৰ এটা বিশেষ ছোৱাট দলেও ঘটনাস্থলীত উপস্থিত হৈ তদন্ত চলাই আছে। অপৰাধীক চিনাক্ত কৰিবলৈ ওচৰ-পাজৰৰ সকলো চিচিটিভি কেমেৰাৰ ফুটেজ তন্ন তন্নকৈ পৰীক্ষা কৰা হৈছে বুলি আৰক্ষীয়ে জানিবলৈ দিয়ে।
এই ঘটনাক কেন্দ্ৰ কৰি এতিয়া ৰাজনৈতিক মহলতো ব্যাপক প্ৰতিক্ৰিয়াৰ সৃষ্টি হৈছে। বিৰোধী দলসমূহে উত্তৰ প্ৰদেশৰ শাসকীয় বিজেপি চৰকাৰক তীব্ৰ সমালোচনা কৰিছে আৰু চৰকাৰৰ পৰা ক্ষিপ্ৰ ব্যৱস্থা গ্ৰহণৰ দাবী জনাইছে। কংগ্ৰেছৰ ৰাষ্ট্ৰীয় সম্পাদক শ্বাহনবাজ আলমে অভিযোগ কৰে যে চৰকাৰে এনে দুষ্কাৰ্য কৰা প্ৰভাৱশালী শ্ৰেণীৰ লোকসকলক ৰক্ষণাবেক্ষণ দি আহিছে। তেওঁ ড° আম্বেদকাৰৰ মূৰ্তি ভঙা ঘটনাক সমগ্ৰ দলিত সমাজৰ আত্মসন্মানৰ ওপৰত হোৱা এক আক্ৰমণ বুলি অভিহিত কৰে।
আনহাতে সমাজবাদী পাৰ্টিৰ মুখপাত্ৰ নাছিৰ চেলিমেও ৰাজ্য চৰকাৰক কঠোৰ সমালোচনা কৰি এই ঘটনাক অতি চিন্তনীয় বুলি আখ্যা দিয়ে। তেওঁ কয় যে ড° আম্বেদকাৰ কেৱল এটা নিৰ্দিষ্ট সম্প্ৰদায়ৰ নেতা নাছিল, তেওঁ আছিল সংবিধানৰ সৃষ্টিকৰ্তা আৰু সমতা, মৰ্যাদা তথা সামাজিক ন্যায়ৰ প্ৰতীক। সেয়েহে মহান নেতাজনৰ প্ৰতিমূৰ্তিত কৰা এনে আক্ৰমণ সঁচাকৈয়ে এক গভীৰ দুৰ্ভাগ্যজনক কাণ্ড।