দিন বাগৰিল!আজি পৰ্যন্ত প্ৰথম আৰু দ্বিতীয় পৰ্যায়ৰ চূড়ান্ত ভোটদানৰ তথ্য ৰাজহুৱা নকৰিলে নিৰ্বাচন আয়োগে
২০২৪ চনৰ লোকসভা নিৰ্বাচনৰ প্ৰথম পৰ্যায়ৰ নিৰ্বাচন ১৯ এপ্ৰিলত আৰু দ্বিতীয় পৰ্যায়ৰ ২৬ এপ্ৰিলত সমাপ্ত হোৱাৰ পাছতো ভাৰতৰ নিৰ্বাচন আয়োগে দুয়োটা পৰ্যায়ৰ চূড়ান্ত ভোটদানৰ পৰিসংখ্যা এতিয়াও প্ৰকাশ কৰা নাই।
উপলব্ধ তথ্যসমূহ কেৱল ‘প্ৰজেক্টেড ট্ৰেণ্ড’ যিবোৰ দুয়োটা পৰ্যায়ৰ পাছত সন্ধিয়া ৭ বজাত ইচিআইয়ে প্ৰকাশ কৰিছিল। ১৯ এপ্ৰিলৰ আনুমানিক ধাৰা ৬০% আৰু ২৬ এপ্ৰিলৰ বাবে ৬০.৯৬%।
ইচিআইৰ এজন শীৰ্ষ বিষয়াই বিজনেছলাইনক জনোৱা মতে, প্ৰথম পৰ্যায়ত চূড়ান্ত ভোটদানৰ শতকৰা হাৰ ৬৬.১৪% আৰু দ্বিতীয় পৰ্যায়ত ৬৬.৭%।বিষয়াজনে কাকতখনক কয় যে, ‘আমি চূড়ান্ত তথ্য সংগ্ৰহ কৰাৰ লগে লগে আমি আমাৰ ৱেবছাইটত পোষ্ট কৰিম।’পিছে এই তথ্য এতিয়াও ৱেবছাইটত উপলব্ধ হোৱা নাই।
কিন্তু বিজনেছলাইনৰ এক প্ৰতিবেদন অনুসৰি ৱেবছাইটটোৰ পৰা কেৱল ভোটিং সম্পৰ্কীয় তথ্যই নহয় বৰঞ্চ সংসদীয় সমষ্টিত পঞ্জীয়নভুক্ত ভোটাৰৰ সংখ্যাও নোহোৱা হৈছে।
উল্লেখযোগ্য যে ইয়াৰ পূৰ্বে দ্য ৱায়াৰে প্ৰকাশ কৰিছিল যে ২০১৯ চনৰ লোকসভা নিৰ্বাচনৰ তুলনাত এতিয়ালৈকে আনুমানিক ভোটদানৰ শতকৰা হাৰ কম।