‘SIR মানে চৰকাৰে ভোটাৰ বাছনি কৰিছে’, মন্তব্য নিৰ্মলা সীতাৰমণৰ অৰ্থনীতিবিদ স্বামী পৰকলা প্ৰভাকৰৰ

তেওঁ দেশৰ প্ৰখ্যাত অৰ্থনীতিবিদ পৰকলা প্ৰভাকৰ। তেওঁৰ আন এটা পৰিচয় হৈছে কেন্দ্ৰীয় বিত্তমন্ত্ৰী নিৰ্মলা সীতাৰমনৰ স্বামী। সদায়ে মোডী চৰকাৰৰ তীব্ৰ সমালোচক প্ৰভাকৰে এতিয়া ভোটাৰ তালিকাৰ বিশেষ গভীৰ সংশোধনী বা এছ আই আৰক লৈ বিতৰ্কৰ সৃষ্টি কৰিছে। তেওঁৰ মতে, SIR মানে চৰকাৰে অন্য দিশলৈ যোৱাৰ পৰিৱৰ্তে পোনপটীয়াকৈ ভোটাৰ বাছনি কৰিছে।

কলকাতাত ‘দ্য এডুকেচনিষ্ট’ ফ’ৰামত অনুষ্ঠিত সংবাদমেলত প্ৰভাকৰে অভিযোগ কৰে যে বৰ্তমান চৰকাৰে যিসকলক দেশত থাকিব নালাগে বুলি বিশ্বাস কৰে তেওঁলোকক বহিষ্কাৰ কৰাৰ লক্ষ্যৰে এছ আই আৰ কৰা হৈছে।

মন কৰিবলগীয়া যে পশ্চিম বংগকে ধৰি দেশৰ ১২খন ৰাজ্যত ইতিমধ্যে ৰাষ্ট্ৰীয় নিৰ্বাচন আয়োগে SIR প্ৰক্ৰিয়াৰ কথা ঘোষণা কৰিছে। প্ৰভাকৰে কয় যে এই বিশেষ গভীৰ সংশোধনে “দেশৰ সাংবিধানিক মূল্যবোধ, চেতনা আৰু নৈতিকতাক গুৰুতৰভাৱে প্ৰভাৱিত কৰিব”।

বিশিষ্ট অৰ্থনীতিবিদজনে পোনপটীয়াকৈ মন্তব্য কৰে, “SIR ৰ ক্ষেত্ৰত ভোটাৰে চৰকাৰ বাছি লোৱাৰ পৰিৱৰ্তে চৰকাৰে ভোটাৰক বাছি লৈছে।” তেওঁ লগতে কয় যে এয়া এক প্ৰকাৰৰ ৰিগ্ৰেছন (পশ্চাদপসৰণ)। NRC-CAA ৰ পিছফালৰ দুৱাৰেদি SIR ৰূপত প্ৰৱেশ! যাতে যিসকল লোক দেশত থাকিব নালাগে বুলি ভাবিছে তেওঁলোকক শাসকীয় দলে উৎখাত কৰিব পাৰে।

প্ৰভাকৰে কয়, “যেতিয়া কাৰোবাক ভোটাধিকাৰৰ পৰা বঞ্চিত কৰা হয় বা ৰাজনৈতিক সমাজৰ পৰা বহিষ্কাৰ কৰা হয়, তেতিয়া তেওঁলোক দ্বিতীয় শ্ৰেণীৰ নাগৰিক হৈ পৰে।” এইটোৱেই এছ আই আৰৰ লক্ষ্য বুলি বিশিষ্ট অৰ্থনীতিবিদগৰাকীয়ে বিশ্বাস কৰে।

তেওঁ লগতে অভিযোগ কৰে যে এছ আই আৰৰ লক্ষ্য হৈছে প্ৰান্তীয়, নিৰক্ষৰ আৰু সংখ্যালঘু সম্প্ৰদায়ৰ ভোটাৰৰ নাম তালিকাৰ পৰা বাদ দিয়া। ইফালে শনিবাৰে উচ্চতম ন্যায়ালয়ত এছ আই আৰ সন্দৰ্ভত এক গোচৰ ৰুজু কৰা হয়। ইতিমধ্যে পশ্চিমবংগ আৰু তামিলনাডুৰ দৰে ৰাজ্য, ৰাজনৈতিক দলসমূহে ইয়াৰ বিৰোধিতা কৰি উচ্চতম ন্যায়ালয়ৰ কাষ চাপিছে। কেৰালা আৰু সেই ৰাজ্যৰ চিপিএমকে ধৰি আন কেইবাটাও দল আদালতলৈ আহিছে।

শুকুৰবাৰে ন্যায়াধীশ সূৰ্য কান্ত, ন্যায়াধীশ এছ ভি এন ভট্টী আৰু ন্যায়াধীশ জয়মাল্য বাগচীৰ বিচাৰপীঠে শুনানি গ্ৰহণ কৰে। এই নতুন আবেদনসমূহ মূলতঃ এছ আই আৰৰ প্ৰক্ৰিয়া আৰু সময়ৰ ওপৰত আপত্তি কৰি দাখিল কৰা হৈছিল। সেই সকলোবোৰ আৱেদনৰ আধাৰত এতিয়া উচ্চতম ন্যায়ালয়ে আয়োগৰ মতামত বিচাৰিছে।