সাৰ কেলেংকাৰী: ৰাজ্যসভাৰ সাংসদ অমৰেন্দ্ৰ ধাৰি সিঙক গ্ৰেপ্তাৰ

দেশজুৰি তুমুল বিতৰ্কৰ সূচনা কৰা সাৰ কেলেংকাৰীৰ সৈতে জৰিত থকাৰ অভিযোগত আজি এনফোৰ্চমেণ্ট সঞ্চালকালয়ে ৰাজ্যসভাৰ আৰজেডিৰ সাংসদ অমৰেন্দ্ৰ ধাৰি সিঙক গ্ৰেপ্তাৰ কৰে।

প্ৰিভেনছন অৱ মানি লাউণ্ড্ৰেৰিং এক্ট, ২০০২ ৰ অধীনত সাংসদগৰাকীক গ্ৰেপ্তাৰ কৰা হয়।দিল্লীৰ ডিফেন্স কল’নিত থকা বাসভৱনৰ পৰাই আজি সাংসদগৰাকীক গ্ৰেপ্তাৰ কৰা হয়।

বিগত মাহত কেন্দ্ৰীয় তদন্তকাৰী সংস্থা চিবিআই-এ সাংসদ সিঙৰ বিৰুদ্ধে এটা গোচৰ ৰুজু কৰিছিল। উল্লেখ্য ইফকো আৰু ইণ্ডিয়ান পটাছ লিমিটেডে বিদেশৰ পৰা পটাছ আৰু পটাছ উৎপাদনত ব্যৱহৃত কেঁচামাল আমদানি কৰাৰ বাবে বহু কেইটা বিদেশী প্ৰতিষ্ঠানক ঠিকা দিছিল।

উক্ত ঠিকা আৱণ্টনত দুৰ্নীতি হোৱাৰ লগতে পটাছ আৰু কেঁচামালৰ দাম বেছিকৈ দেখুৱাই চৰকাৰী ধন আত্মসাৎ কৰা হৈছিল।

এই ঘটনাৰ সৈতে সাংসদ সিঙো জৰিত হৈ পৰিছিল।ডুবাইৰ কিষাণ ইণ্টৰনেছনেল নামৰ প্ৰতিষ্ঠানটোৰ সৈতে সাংসদগৰাকীয়ে ধনৰ অভৈধ লেন-দেন কৰা বুলিও সন্দেহ কৰা হৈছে।

অৱশ্যে সাৰ কেলেংকাৰীত সাংসদগৰাকী আৰু কেনেদৰে জৰিত সেয়া অধিক তদন্ত আৰু জেৰাৰ পিছতহে স্পষ্ট হ’ব।