ৰাকেশ পালৰ কোটি টকাৰ সম্পত্তি বাজেয়াপ্ত

এনফ’ৰ্চমেণ্ট ডিৰেক্তৰেটে অসম লোকসেৱা আয়োগৰ একালৰ অধ্যক্ষ ৰাকেশ কুমাৰ পালৰ প্ৰায় ১.৩ কোটি টকাৰ সাতটা স্থাৱৰ সম্পত্তি মঙলবাৰে বাজেয়াপ্ত কৰিছে।

বাজেয়াপ্ত কৰা স্থাৱৰ সম্পত্তিসমূহৰ ভিতৰত আছে গুৱাহাটীত থকা দুটা ফ্লেট আৰু ভঙাগড়ত এটা বাণিজ্যিক স্থলী।

অস্থাৱৰ সম্পত্তিৰ ৰূপত তেওঁৰ ঘৰৰ পৰা উদ্ধাৰ কৰা ১০লাখ ভাৰতীয় টকাও বাজেয়াপ্ত কৰা হৈছে।

অসম আৰক্ষীয়ে দুৰ্নীতি প্ৰতিৰোধ আইন, ১৯৮৮ৰ অধীনত পঞ্জীয়ন কৰা এজাহাৰৰ ভিত্তিত ই ডিয়ে গোচৰটোৰ প্ৰাথমিক তদন্ত আৰম্ভ কৰিছিল।

অসম লোকসেৱা আয়োগৰ বিভিন্ন পৰীক্ষাত চৰকাৰী সেৱাত প্ৰাৰ্থী নিযুক্তিত অনিয়মৰ তদন্তৰ বাবে আৰক্ষীয়ে এই গোচৰ ৰুজু কৰিছিল।

তদন্তত পোহৰলৈ আহে যে ৰাকেশ পালে অবৈধ ধন তেওঁ আৰু তেওঁৰ পৰিয়ালৰ নামত অসমৰ বিভিন্ন ঠাইত স্থাৱৰ আৰু অস্থাৱৰ সম্পত্তি কিনাত খটুৱাইছিল।

তদন্তত এই কথাও পোহৰলৈ আহে যে পালে চুক্তিৰ নথিপত্ৰ আৰু চেলডীদসমূহত সম্পত্তিসমূহ বজাৰ মূল্যৰ তুলনাত বহু কম দামত কিনা দেখুৱাইছিল।

বিভাগীয় বিষয়াই জনোৱা মতে বিষয়টোৰ অধিক তদন্ত চলি আছে।