তাবলিঘি জামাত মুৰব্বীৰ বিৰুদ্ধে ইডিৰ গোচৰ

এনফ’ৰ্চমেণ্ট ডিৰেক্তৰেটে নিজামুদ্দিনৰ তাবলিঘি জামাতৰ সমগ্ৰ ধন আহৰণৰ প্ৰক্ৰিয়াটো তদন্ত কৰাৰ বাবে এক গোচৰ ৰুজু কৰিছে।

বাতৰি মতে, ধৰ্মীয় সমাৱেশ আৰু বিভিন্ন ৰাজ্যলৈ বিদেশীসকলৰ ভ্ৰমণৰ আয়োজন কৰিবলৈ ভাৰত আৰু দেশৰ বাহিৰৰ পৰাও জামাতলৈ অহা ধনৰ তদন্ত কৰিব সংস্থাটোৱে।

এই সন্দৰ্ভত জামাতৰ মুৰব্বী মৌলানা মহম্মদ ছাদ আৰু এইজনমান সহযোগীলৈ শীঘ্ৰেই চমন জাৰি কৰা হ’ব বুলি বাতৰিটোত প্ৰকাশ।

চৰকাৰী তথ্য মতে, ৭ এপ্ৰিললৈকে দেশৰ প্ৰায় ৩৫ শতাংশ ক’ভিড-১৯ পজিটিভ ঘটনাৰ কাৰণ আছিল জামাতৰ সদস্য।

তাবলিঘি জামাতৰ মুৰব্বী আৰু পাঁচজনৰ বিৰুদ্ধে দিল্লী আৰক্ষীৰ অপৰাধ শাখাই পঞ্জীয়ন কৰা এজাহাৰৰ আধাৰত প্ৰিভেনচন অৱ মানি লণ্ডাৰিং এক্তৰ অধীনত এই তদন্ত কৰা হ’ব।

দেশজোৰা লকডাউন উলংঘন কৰাৰ বাবে জামাতীকেইজনৰ বিৰুদ্ধে এপিডেমিক ডিজিজ এক্ত ১৮৯৭ আৰু ভাৰতীয় দণ্ড বিধিৰ আধাৰত জামাতৰ মুৰব্বী আৰু সহযোগীকেইজনৰ বিৰুদ্ধে এজাহাৰ পঞ্জীয়ন কৰা হৈছে।

আয়কৰ বিভাগেও শীঘ্ৰেই তাবলিঘি জামাতৰ ন্যাসৰক্ষীসকলৰ বিৰুদ্ধে তদন্ত কৰিব বুলি প্ৰকাশ।

জামাতীৰ সংস্পৰ্শলৈ অহা প্ৰায় ২৬,০০০ লোকক দেশজুৰি কুৱাৰেণ্টাইন কৰা হৈছে।

ভিজা চৰ্ত উলংঘনৰ বাবে প্ৰায় ১৮০০ বিদেশী জামাতীক গৃহ মন্ত্ৰ্যালয়ে ব্লেকলিষ্টেড কৰিছে।

জামাতৰ মুৰব্বী ছাদে এতিয়াও কুৱাৰেণ্টাইনত থকা বুলি দাবী কৰি আছে আৰু দিল্লী আৰক্ষীৰ তদন্তত সহযোগ কৰা নাই।

দিল্লী চৰকাৰ আৰু আৰক্ষীৰ মতে জামাতৰ সদস্যসকলক বহু পূৰ্বেই নিজামুদ্দিনৰ মাৰ্কাজ এৰিবলৈ কোৱা হৈছিল, কিন্তু তেওঁলোকে সেয়া উলংঘন কৰিছিল।