অভিনেতা ডিনো ম’ৰেয়াৰ বাসগৃহত অভিযান প্ৰৱৰ্তন সঞ্চালকালয়ৰ অভিযান

শুকুৰবাৰে প্ৰৱৰ্তন সঞ্চালকালয়ে (ইডি) সমগ্ৰ মুম্বাই আৰু কেৰালাৰ ১৫টাতকৈও অধিক স্থানত অভিযান চলায়। তালাচী চলোৱা চৌহদসমূহৰ ভিতৰত আছে বলীউডৰ অভিনেতা ডিনো ম’ৰিয়া, বিএমচিৰ সহকাৰী অভিযন্তা প্ৰশান্ত ৰামুগাডেৰ লগতে কেইবাজনো ঠিকাদাৰৰ বাসগৃহ।

শিৱসেনাৰ (ইউবিটি) নেতা আদিত্য থাকৰেৰ ঘনিষ্ঠ অভিনেতা ডিনো ম’ৰিয়াক ইয়াৰ পূৰ্বে দুবাৰকৈ ই অ’ ডব্লিউৱে জেৰা কৰিছিল। ইডিয়ে এতিয়া অভিযানৰ সময়ত জব্দ কৰা বিত্তীয় নথি-পত্ৰ আৰু অন্যান্য সামগ্ৰীসমূহ পৰ্যালোচনা কৰি অবৈধ ধনৰ প্ৰবাহৰ সন্ধান উলিয়াবলৈ আৰম্ভ কৰিছে।

ইয়াৰ পূৰ্বে ই অ’ ডব্লিউৱে বিএমচিৰ বিষয়া আৰু ঠিকাদাৰকে ধৰি ১৩ জন ব্যক্তিক ২০০৭ চনৰ পৰা ২০২১ চনৰ ভিতৰত কেতিয়াও সম্পন্ন নোহোৱা নদী চাফাই কামৰ বাবে প্ৰৱঞ্চনামূলক ধন পৰিশোধৰ সৈতে জড়িত বুলি অভিযোগ উত্থাপন কৰিছিল।

তদন্তকাৰীয়ে সন্দেহ কৰিছে যে বিশেষ ড্ৰেজিং সঁজুলি ভাড়াৰ নিবিদাত নিৰ্বাচিত যোগানকাৰীক উপকৃত কৰাৰ নামত খেলিমেলি কৰা হৈছিল, যাৰ ফলত বৃহনমুম্বাই পৌৰ নিগমৰ (বিএমচি) যথেষ্ট লোকচান হৈছিল।

উল্লেখ্য যে, মুম্বাইৰ মাজেৰে বৈ গৈ আৰব সাগৰলৈ যোৱা মিথি নদীত দীৰ্ঘদিন ধৰি ডিচিলটিং আৰু বানপানীৰ সমস্যাই জুৰুলা কৰি আহিছে।