কেন্দ্ৰলৈ নোযোৱাকৈ ভোটদান! আগবাঢ়িছে ভাৰতৰ নিৰ্বাচন আয়োগ
ভোটাৰে কেন্দ্ৰলৈ নোযোৱাকৈ দূৰৰ পৰাই ভোটাধিকাৰ সাব্যস্ত কৰাৰ সুবিধা সৃষ্টি কৰাৰ দিশত ভাৰতৰ নিৰ্বাচন আয়োগে কাম কৰি আছে।
বাতৰিমতে, আয়োগে আই আই টি মাদ্ৰাছৰ সৈতে লগ লাগি দূৰৰ পৰাই নিজ সমষ্টিত ভোট দিব পৰা এক প্ৰযুক্তি বিকাশৰ চেষ্টা কৰিছে।
আয়োগৰ জ্যেষ্ঠ বিষয়াৰ উদ্ধৃতিৰে কোৱা হৈছে প্ৰকল্পটো বৰ্তমান গৱেষণা আৰু বিকাশৰ পৰ্য্যায়ত আছে।
বিকাশ কৰিব খোজা ব্যৱস্থাটো কেনে হ’ব? ভোটাৰে ঘৰৰপৰাই ভোট দিব পাৰিবনেকি?
নহয়। এই পদ্ধতিটো ভোটদানৰ বাবে ভোটাৰসকল নিৰ্দিষ্ট এক কেন্দ্ৰলৈ যাব লাগিব। কিন্তু, ধৰক দিল্লীত থকা অসমৰ ভোটাৰ এজনে দিল্লীৰ পৰাই নিজ সমষ্টিত ভোট দিব পাৰিব।
এতিয়ালৈকে ভাৰতত এনে সুবিধা উপলব্ধ হোৱা নাই।
এই প্ৰযুক্তি হ’ব ইণ্টাৰনেট, বায়’মেট্ৰিক ডিভাইচ আৰু ৱেব কেমেৰা-নিৰ্ভৰ।
এই বিকাশমান প্ৰযুক্তি আয়োগে “সঠিক” বুলি চিহ্নিত কৰাৰ পিছত বিভিন্ন অংশীদাৰীৰ সৈতে আলোচনা আৰু নিৰ্বাচনী বিধিৰ সংশোধনৰ পৰৱৰ্তী পৰ্য্যায়তহে ইয়াক সক্ৰিয় কৰা হ’ব।