সাধাৰণৰ জনতাৰ ওপৰত ৰাম টাঙোন : অসমত আকৌ বাঢ়িব বিদ্যুতৰ মাচুল

অসমৰ বিদ্যুৎ গ্ৰাহকসকলৰ বাবে এটা অতি চিন্তাৰ খবৰ আহিছে। ৰাজ্যত আকৌ বিদ্যুৎ মাছুল বৃদ্ধি পাব বুলি ঘোষণা কৰা হৈছে। আছাম পাৱাৰ ডিষ্ট্ৰিবিউচন কোম্পানী লিমিটেড চমুকৈ এ পি ডি চি এলে বিদ্যুতৰ দাম বৃদ্ধি কৰাৰ সিদ্ধান্ত লৈছে। বিদ্যুৎ নিয়ন্ত্ৰণ আয়োগে এই মূল্য বৃদ্ধিত অনুমোদন জনাইছে। ইন্ধন আৰু শক্তি ক্ৰয়ৰ খৰচৰ সৈতে মিলাই এই নতুন নিৰিখ নিৰ্ধাৰণ কৰা হৈছে, যাক এফ পি পি পি এ নিয়ম বুলি কোৱা হয়। এই নতুন নিয়মৰ অধীনত প্ৰতি ইউনিট বিদ্যুতত ১৫ পইচাৰ পৰা ২৮ পইচালৈকে দাম বৃদ্ধি পাব। এই দাম একেলগে বৃদ্ধি নহৈ অহা কেইবামাহো ধৰি পৰ্যায়ক্ৰমে বাঢ়ি যাব।

এই নতুন সূচী অনুসৰি চলিত জুন মাহত প্ৰতি ইউনিট বিদ্যুতৰ দাম ২১ পইচাকৈ বৃদ্ধি পাব। ইয়াৰ পিছত জুলাই মাহত ১৮ পইচা আৰু আগষ্ট মাহত ১৬ পইচাকৈ নিৰিখ বৃদ্ধি পাব। এই দাম বৃদ্ধিৰ প্ৰক্ৰিয়া ইয়াতেই থমকি নৰয়। ছেপ্টেম্বৰ মাহত ১৭ পইচা, নৱেম্বৰ মাহত ১৯ পইচা আৰু ডিচেম্বৰ মাহত ২৪ পইচাকৈ প্ৰতি ইউনিটত দাম বাঢ়িব। আনকি অহা ২০২৭ চনৰ আৰম্ভণিতেও এই বোজা অব্যাহত থাকিব। ২০২৭ চনৰ জানুৱাৰী মাহত ২৬ পইচা, ফেব্ৰুৱাৰী মাহত ২৫ পইচা আৰু মাৰ্চ মাহত আটাইতকৈ বেছি অৰ্থাৎ ২৮ পইচাকৈ বিদ্যুৎ মাছুল বৃদ্ধি পাব।

চৰকাৰী বিষয়াসকলে জানিবলৈ দিয়া মতে ইন্ধন আৰু শক্তি উৎপাদন বা ক্ৰয় কৰাৰ খৰচ সলনি হোৱাৰ বাবেই এই নতুন নিৰিখ তৈয়াৰ কৰা হৈছে। এই নতুন নিয়ম চলিত বছৰৰ জুন মাহৰ পৰা ২০২৭ চনৰ মাৰ্চ মাহলৈকে কাৰ্যকৰী হৈ থাকিব। ইফালে বজাৰত নিত্য ব্যৱহাৰ্য সামগ্ৰী আৰু পেট্ৰ’ল-ডিজেলৰ মূল্য বৃদ্ধিৰ মাজতে বিদ্যুতৰ দাম এনেদৰে বাৰে বাৰে বৃদ্ধি পোৱাৰ বাবে সাধাৰণ গ্ৰাহকসকলৰ মাজত তীব্ৰ চিন্তাৰ সৃষ্টি হৈছে। এই সিদ্ধান্তই ৰাজ্যখনৰ সৰ্বসাধাৰণ ৰাইজৰ ওপৰত এক অতিৰিক্ত অৰ্থনৈতিক চাপ সৃষ্টি কৰিব বুলি গ্ৰাহকসকলে ক্ষোভ প্ৰকাশ কৰিছে।