পৰ্যটকৰ বাবে কাজিৰঙাত আজিৰে পৰা আৰম্ভ হ’ল হাতী ছাফাৰী

চলিত পৰ্যটন বৰ্ষত যোৱা ২১ অক্টোবৰত কাজিৰঙা ৰাষ্ট্ৰীয় উদ্যান বিশ্বৰ পৰ্যটকৰ বাবে মুকলি
হোৱাৰ পাচত আজি পুৱা ৰাষ্ট্ৰীয় উদ্যানখনত পৰ্যটকৰ বাবে হাতী ছাফাৰীও আৰম্ভ হয় ৷

আজি পুৱা ৰাষ্ট্ৰীয় উদ্যানখনৰ কহঁৰাৰ মিহিমুখ প্ৰৱেশদ্বাৰত অনুষ্ঠিত গনেশ পুজাৰে হাতী ছাফাৰী আৰম্ভ হয়৷

বিভাগীয় মাউটসকলে কৰা গনেশ পূজাৰেই আজি পুৱা চলিত পৰ্যটন বৰ্ষৰ বাবে হাতী ছাফাৰী আৰম্ভ
কৰা হয় কাজিৰঙা ৰাষ্ট্ৰীয় উদ্যানত ৷

কভিড ১৯ সংক্ৰমণ প্ৰতিৰোধৰ বিভাগীয় প্ৰট’কল মানি কহঁৰা বনাঞ্চলৰ মিহিমুখত আৰম্ভ কৰা হাতী ছাফাৰী উদ্বোধনী অনুষ্ঠানত নাৰিকল ভাঙে ডি এফ অ’ ৰমেশ গগৈয়ে আৰু ফিটা কাটে ৰাষ্ট্ৰীয় উদ্যান খনৰ সঞ্চালক পি শিৱকুমাৰে ৷

উদ্বোধনৰ পাচতেই বিভাগীয় হাতীৰে পৰ্যটকক ৰাষ্ট্ৰীয় উদ্যান দৰ্শন কৰোৱা হয় ৷

প্ৰথম দিনৰ হাতী ছাফাৰী কৰা পৰ্যটকৰ বেছি ভাগেই বৰ্হি ৰাজ্যৰ বুলি জানিব পৰা গৈছে ৷ বিভাগীয় সুত্ৰ মতে যোৱা ২১ অক্টোৱৰত ৰাষ্ট্ৰীয় উদ্যানখনত জীপ ছাফাৰী আৰম্ভ হোৱাৰ পাছত ইতিমধ্যেই প্ৰায় ৩০০০ পৰ্যটকে ৰাষ্ট্ৰীয়
উদ্যানখন দৰ্শন কৰিছে ৷

উল্লেখ্য যে ১৯৩৮ চনত প্ৰথম বাৰৰ বাবে বিশ্বৰ পৰ্যটকৰ বাবে কাজিৰঙা মুকলি কৰা হৈছিল ৷ যাৰ  পটভুমিত এইবাৰ ৮২ সংখ্যক পৰ্যটন বৰ্ষ আৰম্ভ হ’ল কাজিৰঙা ৰাষ্ট্ৰীয় উদ্যানত ৷