একেলগে লটাৰী কাটি কোটিপতি হ’ল কেৰালাৰ ১১ গৰাকী মহিলা; ২৫০ টকাত পালে ১০ কোটি!

বহুতে ভাগ্যত বিশ্বাস কৰে আৰু ৰাতিটোৰ ভিতৰতে কোটিপতি হোৱাৰ সপোন দেখে। সেইদৰে লটাৰীৰ টিকট কাটি থাকে। তেনেদৰেই কেৰালাৰ ১১ গৰাকী মহিলাই লাভ কৰিলে কোটি কোটি টকা! ১ কোটি, ২ কোটি নহয়, সন্মিলিতভাৱে জিকিলে দহ কোটি টকাৰ লটাৰী!

কিন্তু এয়াই প্ৰথম নহয়। ইয়াৰ আগতেও তেওঁলোকে লটাৰীত একেলগে টকা জিকিছে। লটাৰীত জয়ী হোৱা সেই ১১গৰাকী মহিলা পৌৰকৰ্মী। তেওঁলোকে মালাপ্পুৰম জিলাৰ প্লাষ্টিক আৱৰ্জনা পৃথকীকৰণ বিভাগত কাম কৰে। কিন্তু তাৰ পৰা তেওঁলোকে সামান্যহে উপাৰ্জন কৰে।

কঠোৰ পৰিশ্ৰম কৰে যদিও তেওঁলোকে নিজৰ প্ৰয়োজন পূৰণ, অভাৱ দূৰ কৰিবলৈ সক্ষম নহয়। সেয়ে, ভাগ্য ঘূৰাই অনাৰ আশাত সকলোৱে একেলগে লটাৰী কটাৰ সিদ্ধান্ত লয়। আশা যদি কেতিয়াবা লটাৰী লাগে, তেতিয়া সংসাৰলৈ ভাল দিন ঘূৰি আহিব।

লগতে পঢ়ক: ৰিয়ান পৰাগৰ চমক! ১১টা ছয় আৰু ৫টা চাৰিৰে দুৰ্দান্ত শতক; ১৩১ ৰানৰ ইনিংছেৰে যোগ্য প্ৰত্যুত্তৰ সমালোচকক!

এইদৰেই এদিন সকলোৱে টকা সংগ্ৰহ কৰি টিকট কাটিলে। তেওঁলোকে লটাৰীত জিকিলেও। সেইবাৰ তেওঁলোকে সাড়ে সাত হাজাৰ টকা লাভ কৰিছিল। সেই টকা সকলোৱে ভাগ কৰি লৈছিল। সেয়াই সপোন দেখাৰ আৰম্ভণি।

তেতিয়াৰ পৰাই তেওঁলোক আত্মবিশ্বাসী হৈ পৰিল। সেই বিশ্বাসৰেই এইবাৰো তেওঁলোকে লটাৰীৰ টিকট কাটিলে। আৰু এইবাৰ কপাল ফুলিল। একেবাৰে ১০ কোটি টকা পাই পৌৰকৰ্মীকেইগৰাকীৰ সৌভাগ্য মুকলি হ’ল।

তেওঁলোকৰ সামান্য উপাৰ্জনৰ পৰা অলপ অলপ টকা তুলি ২৫০ টকাৰ টিকট কিনিছিল। লটাৰীৰ ফলাফল ঘোষণা হোৱাৰ দিনা তেওঁলোক নিজৰ কামত ব্যস্ত হৈ আছিল। পিছত যেতিয়া তেওঁলোকে গম পায় যে তেওঁলোকে ১০ কোটি টকা জিকিছে, তেতিয়া তেওঁলোকৰ আনন্দ উপচি পৰে।

লগতে পঢ়ক: মণিপুৰত অব্যাহত হিংসা! গুলীচালনাত ২ জন সাধাৰণ নাগৰিক নিহত; ৬টা ঘৰত অগ্নিসংযোগ

এই খবৰ শুনি বহুতে তেওঁলোকক অভিনন্দন জনায়। তেওঁলোকৰ মাজৰে ৰাধা নামৰ এগৰাকী মহিলাই কয়, “আমি বৰ সুখী।” এতিয়া আমি সকলোৱে আমাৰ সমস্যাবোৰ দূৰ কৰিব পাৰিম।”