তিষ্ঠিবই নোৱাৰিলে! ইংলেণ্ডৰ বিৰুদ্ধে প্ৰথম টী-২০ত ভাৰতৰ ‘বিৰাট’ পৰাজয়
চলিত বৰ্ষৰ প্ৰথমখন টী-২০ মেচত ইংলেণ্ডৰ বিৰুদ্ধে ৮উইকেটত পৰাজিত হৈছে ভাৰত। ইংলেণ্ডে মাত্ৰ ১৫.৩ অভাৰতে সম্পূৰ্ণ কৰে নিজৰ লক্ষ্য। ইয়াৰ লগতে এক লজ্জাজনক অভিলেখো গঢ়ে অধিনায়ক বিৰাট কোহলিয়ে।
টেষ্ট ছিৰিজত দেখুওৱা দমনীয় প্ৰদৰ্শনৰ বিপৰীতে টী-২০ ছিৰিজৰ আৰম্ভণিতেই ছন্দপতন দেখা গ’ল টীম ইণ্ডিয়াৰ।
অধিনায়ক বিৰাট কোহলিয়ে জানিবলৈ দিছিল যে কে এল ৰাহুল আৰু ৰোহিত শৰ্মাই অপেন কৰিব। সেইদৰে শিখৰ ধাৱান বেঞ্চত থাকিব।
কিন্তু অৱশেষত ৰাহুলে অপেন কৰিলে যদিও ৰোহিত শৰ্মাক টীম মেনেজমেন্টে জিৰণি দিয়ে। তাৰ সলনি ধাৱানে সুযোগ লাভ কৰে।
পিচে, বিশ্বকাপৰ পূৰ্বে আখৰা মেচত ৰাহুল আৰু ধাৱান দুয়োজনেই ব্যৰ্থ হ’ল। ৰাণ কৰিব নোৱাৰিলে বিৰাট কোহলিয়েও।
ভাৰতৰ ইনিংছৰ সমাপ্তি ঘটিল মাত্ৰ ১২৪ৰাণত। শ্ৰেয়াস আয়াৰৰ বাহিৰে কোনো এজনে দুটা অংকৰ সীমা অতিক্ৰম কৰিব নোৱাৰিলে। প্ৰত্যুত্তৰত বেট কৰিবলৈ নামি ভাৰতীয় বলাৰৰ ওপৰত দমন অব্যাহত ৰাখে ইংলেণ্ডৰ তাৰকা বেটছমেনে।
চাৰি অভাৰৰ খেল বাকী থকা অৱস্থাতে মাত্ৰ দুটা উইকেট হেৰুৱাই নিজৰ লক্ষ্য অতিক্ৰম কৰে ইংলেণ্ডে। জেছন ৰয় ৪৯, বাটলাৰ ২৮ আৰু বেয়াৰষ্টোৱে ২৬ৰাণৰ ইনিংছ খেলে।
ইপিনে, ইংলেণ্ডৰ বিৰুদ্ধে প্ৰথমখন টী-২০ মেচত পৰাজিত হোৱাৰ সমান্তৰালভাৱে এক লজ্জাজনক অভিলেখ গঢ়ে বিৰাট কোহলিয়ে।
ভাৰতীয় অধিনায়ক হিচাপে ১৪বাৰ শূন্য ৰাণত আউট হয় কোহলি। ইয়াৰ পূৰ্বে এই অভিলেখ আছিল সৌৰভ গাংগুলীৰ নামত।