খহনীয়াৰ তাণ্ডৱ : সোৱনশিৰি নদীক ভেটিবলৈ ওলাই আহিল মাজুলী-লখিমপুৰ সীমান্তৰ ৩২খন গাঁও
মাজুলী-লখিমপুৰ সীমান্তৱৰ্তী লখিমপুৰ জিলাৰ অন্তৰ্গত লোহিত-খাৱলুত নদীৰ খহনীয়াই কালৰূপ ধাৰণ কৰিছে। বৃহত্তৰ কৃষি পথাৰ, ঘৰ-বাৰী জাহ গৈছে নদীৰ বুকুত। পৰিৱৰ্তনকামী চৰকাৰ খনৰ পৰিৱৰ্তনৰ ঢৌৱে ঢুকি নোপোৱা অঞ্চলবাসীৰ মাজত এতিয়া সকলো হেৰুওৱাৰ বেদনা।
বানৰ পাছতে লোহিত-খাৱলুত সৃষ্টি হোৱা নদীৰ খহনীয়াই মষিমূৰ কৰি নিছে এফালৰ পৰা সকলো। বিশেষকৈ লোহিত-খাৱলুৰ ললিতি মৰাং গাঁৱত বিগত দুটা বছৰে সোৱনশিৰি নদীৰ বুকুত ৩৫ টা পৰিয়ালে সকলো হেৰুৱাইছে।
বিভাগীয় কৰ্তৃপক্ষক স্থানীয় ৰাইজে বহুবাৰ খহনীয়া প্ৰতিৰোধৰ বাবে আবেদন নিবেদন কৰাৰ পাছতো আজিকোপতি কোনো গুৰুত্ব দিয়া পৰিলক্ষিত হোৱা নাই। সেয়ে উপায়ন্তৰ হৈ লোহিত-খাৱলুৰ ৩২ খন গাঁৱৰ ৰাইজে ওলাই আহিল গড়া খহনীয়া প্ৰতিৰোধ কৰিবলৈ।
অঞ্চলটোৰ লোকসকলে হাতে হাতে দা কুঠাৰ লৈ আহি বাঁহৰ বুৰুজ আৰু গছৰ ডালেৰে খহনীয়া প্ৰতিৰোধৰ প্ৰয়াস কৰে। সোৱনশিৰি নদীৰ গতিক বাধা দিবলৈ নদীৰ বুকুত গছৰ ডাল আৰু বাঁহেৰে খহনীয়া ৰোধৰ চেষ্টা চলায়।
চৰকাৰী আঁচনিয়ে ঢুকি নোপোৱা লখিমপুৰ জিলাৰ লোহিত-খাৱলু পঞ্চায়তৰ অন্তৰ্গত অঞ্চলটো সুৰক্ষাৰ বাবে শীঘ্ৰে চৰকাৰক বিহিত ব্যৱস্থা কৰিবলৈ চৰকাৰক আহ্বান জনায় অঞ্চলবাসীয়ে।