‘হৰ ঘৰ ত্ৰিৰংগা’ যাত্ৰাত অথন্তৰ: গৰুৱে মহতিয়ালে গুজৰাটৰ প্ৰাক্তন উপ মুখ্যমন্ত্ৰীক

দেশৰ স্বাধীনতাৰ ৭৫ তম বৰ্ষপূৰ্তি উলহ-মালহেৰে আয়োজন কৰিছে বিজেপিয়ে। স্বাধীনতা দিৱস উদযাপনৰ বাবে গ্ৰহণ কৰা হৈছে আজাদী কা অমৃত মহোৎসৱ কাৰ্যসূচী।

আনহাতে সমসাময়িকভাৱে জনসাধাৰণৰ মনত দেশপ্ৰেমৰ ভাৱ জগাই তুলিবলৈ হৰ ঘৰ ত্ৰিৰংগা শীৰ্ষক আন এক কাৰ্যসূচীও গ্ৰহণ কৰিছে মোদী চৰকাৰে।

এই হৰ ঘৰ ত্ৰিৰংগা অভিযান সফল কৰি তুলিবৰ বাবে বিজেপিয়ে দলীয়ভাৱেও প্ৰচাৰত নামি পৰিছে। এনে এক প্ৰচাৰ কাৰ্যসূচীত অংশগ্ৰহণ কৰিবলৈ গৈ বিপদত পৰিছে গুজৰাটৰ প্ৰাক্তন উপ মুখ্যমন্ত্ৰী নিতিন পেটেল।

গুজৰাটৰ কাদি চহৰত আজি আয়োজন কৰা হৰ ঘৰ ত্ৰিৰংগা ৰেলীত অংশগ্ৰহণ কৰিছিল নীতিন পেটেলে। যাত্ৰাৰ সময়তে এটা গৰুৱে শোভাযাত্ৰাৰ মাজত সোমাই খুন্দা মাৰে নিতিন পেটেলক।

গৰুৰ খুন্দাত আঘাতপ্ৰাপ্ত নীতিন পেটেলক শোভাযাত্ৰাৰ মাজৰ পৰাই ততাতৈয়াকৈ চিকিৎসালয়লৈ লৈ যোৱা হৈছিল। প্ৰকাশিত খবৰ অনুসৰি গৰুটোৱে খুন্দা মৰাৰ পিছত পেটেল মাটিত বাগৰি পৰে আৰু আঁঠুত আঘাত পায়।

অৱশ্যে প্ৰাথমিক পৰীক্ষাৰ পিছত পেটেলৰ আঘাত গুৰুতৰ নহয় বুলি চিকিৎসকসকলে ঘোষণা কৰিছে।