জিতেন দত্ত আৰু মৃনাল হাজৰিকাক বিনাচৰ্তে মুক্তিৰ দাবী প্ৰাক্তন আলফা ঐক্য মঞ্চৰ
আলোচনাপন্থী আলফা নেতা মৃণাল হাজৰিকা আৰু জিতেন দত্তক গ্রেপ্তাৰ কৰা কাৰ্যক তীব্ৰ গৰিহণা দি তেওঁলোকক শীঘ্ৰে মুকলি কৰিবৰ বাবে দাবী জনাইছে বৃহত্তৰ বোকাখাত প্রাক্তন আলফা ঐক্যমঞ্চৰ কাজিৰঙা আঞ্চলিক সমিতি, খুমটাই আঞ্চলিক সমিতি আৰু দেৰগাঁও আঞ্চলিক সমিতিয়ে।
উক্ত সমিতিকেইখনৰ এক সঁজাতি দলে আজি বোকাখাতৰ মহকুমাধিপতিৰ যোগেদি মুখ্য মন্ত্ৰী সৰ্বানন্দ সোণোৱাললৈ এই সম্পৰ্কত এখন স্মাৰক পত্ৰ প্ৰেৰণ কৰে।
স্মাৰকপত্ৰৰ জৰিয়তে তেওঁলোকে ‘জাতীয় সংকটৰ সময়ত জাতিৰ হকে মাত মতা নেতা দুজনক একপক্ষীয়া গ্রেপ্তাৰ’ কৰা হৈছে বুলি উল্লেখ কৰি দুয়ো গৰাকীকে অতি বিনাচৰ্তে মুকলি কৰিবৰ বাবে দাবী জনায়।
তদুপৰি সাম্প্ৰতিক সময়ত, ‘প্ৰৰোচনামূলক বক্তব্যৰে অসমত সাম্প্রদায়িক বিষবাষ্প বিলাই সংঘর্ষ সৃষ্টি কৰিবলৈ বিচৰা বিজেপি বিধায়ক শিলাদিত্য দেব, সাংসদ ৰাজেন গোঁহাই, প্রদীপ দত্ত ৰায়, সুকুমাৰ বিশ্বাসৰ দৰে ব্যক্তিক’ শীঘ্ৰেই গ্রেপ্তাৰ কৰিবলৈও তেওঁলোকে দাবী জনায়।
আনহাতে অসমীয়া জাতিক সংকটত পেলাব পৰা জাতিদ্রোহী নাগৰিক সংশোধনী বিধেকয়ৰ বিৰুদ্ধে বিধানসভাত বিধেয়ক গৃহীত কৰি শীঘ্রে ব্যৱস্থা গ্রহণ কৰিবৰ বাবেও প্ৰাক্তন আলফাৰ সদস্য সকলে মুখ্য মন্ত্ৰীক দাবী জনায়।
আজিৰ এই সঁজাতি দলটোক বোকাখাত ৰজাবাৰীৰ প্ৰাক্তন আলফা যতীন বৰা, কাজিৰঙাৰ দীপক দাস, খুমটাইৰ লক্ষী গগৈ আৰু দেৰগাঁৱৰ ৰুবুল দত্তই নেতৃত্ব প্ৰদান কৰে।