ভাৰতত ঘৃণামূলক ভাষণ, ভুল তথ্য, হিংসাত্মক প্ৰচাৰত বিপৰ্যস্ত ফেচবুক
ভাৰতত ভুল তথ্য, ঘৃণামূলক ভাষণ আৰু হিংসাত্মক প্ৰচাৰত বিপৰ্যস্ত হৈ পৰিছে ফেচবুক। আমেৰিকা যুক্তৰাষ্ট্ৰৰ এক সংবাদ মাধ্যমৰ প্ৰতিবেদনত প্ৰকাশ পাইছে এই কথা।
প্ৰতিবেদনখনত কোৱা হৈছে যে ছ’চিয়েল মিডিয়াৰ গৱেষকসকলে আঙুলিয়াই দিছে যে ভাৰতত ফেচবুক প্লেটফৰ্মত উচতনিমূলক আৰু বিভ্ৰান্তিকৰ মুছলমান বিৰোধী সমলৰে পৰিপূৰ্ণ গোট আৰু পৃষ্ঠা আছে।
প্ৰতিবেদনটোত কোৱা হৈছে, এজন ফেচবুক গৱেষকে ২০১৯ চনৰ ফেব্ৰুৱাৰী মাহত কেৰালাত বাস কৰা এজন ব্যক্তিৰ বাবে ফেচবুক ব্যৱহাৰ কেনেদৰে হ’ব সেইয়া পৰীক্ষা কৰিবলৈ এটা একাউণ্ট সৃষ্টি কৰিছিল।
পৰৱৰ্তী তিনি সপ্তাহৰ বাবে ফেচবুকৰ নীতি নিয়মে নিৰ্ধাৰণ কৰা সকলো পৰামৰ্শ অনুসৰণ কৰি গোটত যোগদান কৰা, ভিডিঅ’ চোৱা আৰু পনতুন ফেচবুক অন্বেষণ কৰা আদি সাধাৰণ কাৰ্যৰ মাজেৰে একাউণ্টটো পৰিচালিত হৈছিল।
পিছলৈ একাউণ্টটোত ঘৃণামূলক ভাষণ, ভুল তথ্য আৰু হিংসাত্মক ঘটনা প্ৰচাৰ হৈছিল, যিবোৰ সেই মাহৰ শেষৰ ফালে প্ৰকাশিত এক আভ্যন্তৰীণ ফেচবুক প্ৰতিবেদনত নথিভুক্ত কৰা হৈছিল।
নথিসমূহ ফেচবুকৰ প্ৰাক্তন কৰ্মচাৰী ফ্ৰান্সেছ হাগেনৰ দ্বাৰা সংগ্ৰহ কৰা প্ৰতিবেদনৰ এক অংশ।
ডাটা অভিযন্তা হাগেনে শেহতীয়াকৈ আমেৰিকা যুক্তৰাষ্ট্ৰৰ চিনেটৰ সন্মুখত ফেচবুক আৰু ইয়াৰ ব্যৱহৃত মঞ্চৰ বিষয়ে সাক্ষ্য দিছিল।
ছ’চিয়েল মিডিয়া প্লেটফৰ্মৰ আভ্যন্তৰীণ নথিপত্ৰত দেশৰ শাসকীয় দল আৰু বিৰোধী ব্যক্তিসকলৰ সৈতে সম্পৰ্কিত ভুৱা একাউণ্টবোৰে ভাৰতৰ ৰাষ্ট্ৰীয় নিৰ্বাচনত কেনেদৰে ভুৱা প্ৰচাৰ চলাইছিল তাৰ বিৱৰণ অন্তৰ্ভুক্ত আছে।
বাতৰি কাকতখনে প্ৰকাশ কৰিছে যে ২০১৯ চনৰ ৰাষ্ট্ৰীয় নিৰ্বাচনৰ পিছত প্ৰস্তুত কৰা এক পৃথক প্ৰতিবেদনত ফেচবুক কৰ্ত্তৃপক্ষই জানিব পাৰিছে যে ভাৰতৰ পশ্চিম বংগত ৪০ শতাংশতকৈও অধিক শীৰ্ষ দৃষ্টিভংগী ভুৱা বা অপ্ৰামাণিক।
প্ৰতিবেদন এইটোও প্ৰকাশ হৈছে যে এটা ভুৱা একাউণ্টে ৩০ মিলিয়নতকৈও অধিক প্ৰভাৱ বিস্তাৰ কৰিছিল।
ফেচবুক কৰ্ত্তৃপক্ষৰ সদৰী কৰিছে যে মুছলমান বিৰোধী পোষ্টকে ধৰি ভুৱা বাৰ্তাৰ প্ৰচাৰবোৰৰ সৈতে যুঁজিবলৈ ফেচবুক শক্তিশালী হোৱা নাছিল আৰু সক্ষম হোৱা নাছিল।
ফেচবুকৰ মুখপাত্ৰজনে কয় যে কোম্পানীটোৱে এই বছৰ মানুহে দেখা ঘৃণামূলক বাৰ্তাৰ প্ৰচাৰ নিয়ন্ত্ৰণ কৰিছে আৰু এইবোৰৰ পৰিমাণ আধা হ্ৰাস কৰিছে।
“আমি হিন্দী আৰু বঙালীকে ধৰি বিভিন্ন ভাষাত ঘৃণামূলক ভাষণ বিচাৰি প্ৰযুক্তিবিদ্যাত যথেষ্ট বিনিয়োগ কৰিছো। ইয়াৰ ফলস্বৰূপে, আমি এই বছৰ মানুহে দেখা ঘৃণামূলক ভাষণৰ পৰিমাণ আধা হ্ৰাস কৰিছো। বিশ্বব্যাপী মুছলমানকে ধৰি প্রান্তিক গোটসমূহৰ বিৰুদ্ধে ঘৃণামূলক ভাষণ বৃদ্ধি পাইছে।”- ফেচবুক কৰ্ত্তৃপক্ষই কয়।