ধুবুৰীত ভুৱা প্ৰমানপত্ৰ প্ৰস্তুত কৰা জালিয়াতি চক্ৰ উৎখাত, দুজনক গ্ৰেপ্তাৰ
Fake certificate racket busted: ধুবুৰী আৰক্ষীয়ে শনিবাৰে ধুবুৰী চহৰৰ নাথপাৰা অঞ্চলত এক অভিযান চলাই ভুৱা শৈক্ষিক প্ৰমানপত্ৰ তথা আন নথি প্ৰস্তুত কৰাত জড়িত এটা জালিয়াতি চক্ৰ উৎখাত কৰে।
এটা চুৰিৰ গোচৰত নাথাপাৰা অঞ্চলৰ গোলা শ্বাহজামাল নামৰ ব্যক্তিৰ বাসগৃহত তালাচী অভিযান চলোৱাৰ সময়ত এই চক্ৰটোৰ কথা পোহৰলৈ আহে।
আৰক্ষীয়ে জানিবলৈ দিয়ে যে কেইদিনমান পূৰ্বে এক বিশেষ সূত্ৰৰ খৱৰৰ ভিত্তিত ছহিদুল ওৰফে ছহিবুৰ ৰহমান নামৰ লোকজনক ধুবুৰী চহৰৰ ভাটিগাঁও এলেকাৰ পৰা গ্ৰেপ্তাৰ কৰা হৈছিল আৰু তেওঁৰ জিম্মাৰ পৰা কিছুমান ভুৱা প্ৰমানপত্ৰ তথা নথি উদ্ধাৰ কৰা হৈছিল।
ছহিদুলৰ স্বীকাৰোক্তিৰ ভিত্তিত ধুবুৰী আৰক্ষীয়ে শনিবাৰে গোলাম শ্বাহজামালৰ বাসগৃহত পুনৰ এক তালাচী চলায় আৰু চৌহদৰ ভিতৰত এটা ভুৱা প্ৰমানপত্ৰ বনোৱা সৰু কাৰাখান ধৰা পেলায়।
ধুবুৰীৰ অতিৰিক্ত আৰক্ষী অধীক্ষক ৰজীৰাণী শৰ্মাৰ নেতৃত্বত প্ৰায় এঘন্টা ধৰি অভিযান চলোৱা হয় আৰু আৰক্ষীৰ দলটোৱে বহু ভুৱা প্ৰমানপত্ৰ তথা নথি উদ্ধাৰ কৰিবলৈ সক্ষম হয়।
আৰক্ষীয়ে লগতে ভুৱা প্ৰমানপত্ৰ চক্ৰৰ মূল ব্যক্তিজনৰ চৌহদৰ পৰা দুটা লেপটপ, কম্পিউটাৰ আৰু হাই ডিফিনেশ্বন প্ৰিন্টাৰ জব্দ কৰে।
ঘৰটোৰ মালিক গোলাম শ্বাহজামালক এক ভুৱা নথি প্ৰস্তুত কৰা, অপৰাধমূলক ষড়যন্ত্ৰ তথা চৰকাৰী ষ্টাম্প ব্যৱহাৰ কৰি কৰা এনে নিকৃষ্ট কাণ্ডৰ বাবে জালিয়াতিৰ অভিযোগত গ্ৰেপ্তাৰ কৰে।
আনহাতে, তেওঁৰ আন সহযোগীসকলক এতিয়াও গ্ৰেপ্তাৰ কৰা নাই যদিও ভুৱা জালিয়াতি চক্ৰটোৰ আন অপৰাধীসকলক গ্ৰেপ্তাৰৰ বাবে অবিযান অব্যাহত ৰখা বুলি জানিবলৈ দিয়ে অতিৰিক্ত আৰক্ষী অধীক্ষক ৰজীৰাণী শৰ্মাই।