আনৰ পঞ্জীয়ন নম্বৰ ব্যৱহাৰেৰে চিকিৎসা চলোৱা ভুৱা চিকিৎসকৰ বিৰুদ্ধে এজাহাৰ দাখিল

আন চিকিৎসকৰ পঞ্জীয়ন নম্বৰ ব্যৱহাৰ কৰি জালিয়াতিৰে উত্তৰ লখিমপুৰত চিকিৎসা চলাই অহা চিকিৎসক এগৰাকীৰ কথা পোহৰলৈ আহিছে।

চিকিৎসক অবিনাশ শইকীয়াই আন চিকিৎসকৰ পঞ্জীয়ন নম্বৰ ব্যৱহাৰ কৰি  লখিমপুৰ আৰু ধেমাজি জিলাত ৰোগীৰ চিকিৎসা চলাই আহিছিল।

নিজকে এম বি বি এছ, ডি ভি এল, এফ এ এম, এছথেটিক মেডিচিন ফেল’শ্বিপ প্ৰাপক, চৰ্মৰোগ, চুলি,নখ আৰু যৌনৰোগ বিশেষজ্ঞ, কনছালটেন্ট ডাৰমেট’লজিষ্ট এণ্ড কস্মেট’লজিষ্ট হিচাপে পৰিচয় দিয়া প্ৰৱঞ্চক চিকিৎসকগৰাকীয়ে যোৰহাট মেডিকেল কলেজ ও হাস্পাতালৰ অৰ্থ’পেডিকছ বিভাগৰ সহকাৰী অধ্যাপক ড০ কিৰণ সোণোৱালৰ পঞ্জীয়ন নম্বৰ ১৯৯৪৭(আসাম মেডিকেল কাউন্সিল) ব্যৱহাৰ কৰি চৰ্মৰোগৰ চিকিৎসা চলাই আহিছিল।

বিষয়টো সন্দৰ্ভত শইকীয়াক ড০ কিৰণ সোণোৱালে যোগাযোগ কৰাৰ পাছতে এই ঘটনা পোহৰলৈ আহে। শইকীয়াই ড০ কিৰণ সোণোৱালক জানিব দিছিল যে ছপাৰ ভুলৰ বাবে আনটো পঞ্জীয়ন নম্বৰ ১৯৪৪৭ৰ ঠাইত ভুলকৈ উক্ত নম্বৰটো ছপা হৈছে।

অবিনাশ শইকীয়াই এই ১৯৪৪৭ পঞ্জীয়ন নম্বৰটো ব্যৱহাৰ কৰি উত্তৰ লখিমপুৰৰ টাউন মেডিকেল হলটো চৰ্মৰোগৰ চিকিৎসা চলাই আহিছে।

ইপিনে, ড০ কিৰণ সোণোৱালেও শইকীয়াৰ বিৰুদ্ধে ধেমাজিৰ যুটীয়া স্বাস্থ্য সঞ্চালকৰ হাতত এখন অভিযোগ পত্ৰ দাখিল কৰিছে। উত্তৰ লখিমপুৰত শুকুৰবাৰে দুৰ্নীতি বিৰোধী যুৱ শক্তি, অসমে উত্তৰ লখিমপুৰ আৰক্ষী থানাত ভুৱা চিকিৎসকজনৰ বিৰুদ্ধে এখন এজাহাৰ দাখিল কৰিছে।

সংবাদ মাধ্যমক সম্বোধন কৰি সংগঠনটোৰ ৰাজ্যিক সভাপতি ধৰ্মকান্ত গগৈয়ে লখিমপুৰ আৰু ধেমাজি জিলা প্ৰশাসনক ভুৱা চিকিৎসকজনৰ বিৰুদ্ধে এক তদন্তৰ চলোৱাৰ দাবী কৰে।