অসমলৈ আহি মেগছেছে বঁটা বিজয়ী ৰাজিন্দৰ সিঙে কি ক’লে?

বঙাইগাঁৱৰ এন টি পি চিয়ে ‘এমিনেন্ট স্পীকাৰ চিৰিজ’( প্ৰসিদ্ধ ব্যাক্তিৰ বক্তৃতা শিতান)ৰ অধীনত ইয়াৰ কৰ্মচাৰীসকলৰ উদ্দেশ্যে ভাষণ ৰখাৰ লগতে পৰিয়ালৰ সদস্যসকলৰ সৈতে ভাৱ বিনিময় কৰাৰ বাবে এইবাৰ ৰমন মেগছেছে বঁটা বিজয়ী বিশিষ্ট সমাজকৰ্মী ৰাজিন্দৰ সিঙক আমন্ত্ৰণ কৰি আনিছিল।

‘ৱাটাৰ গান্ধী’ হিচাপে অধিক পৰিচিত সিঙে সমাজৰ উত্তৰ পুৰুষৰ বাবে জল ব্যৱস্থাপনাৰ দিশত জৰুৰী প্ৰয়োজনীয়তাৰ বিষয়ে বক্তৱ্য ৰাখে। ৰাজিন্দৰ সিঙে ভূমি জল হ্ৰাস পোৱা আৰু ভাৰতৰ নদীসমূহলৈ অহা সংকটৰ বিষয়ে আগবঢ়োৱা এক চিত্তাকৰ্ষক বক্তৱ্যই উপস্থিত দৰ্শকসকলৰ বাবে প্ৰেৰণাদায়ক তথা আলোকসন্ধানী ৰূপত ধৰা দিয়ে।

তেওঁ তেওঁৰ ৰাজস্থানৰ অভিযানৰ বিষয়ে উল্লেখ কৰি তাত কেনেকৈ মৰুভূমি উৰ্বৰ সেউজ ভূমিলৈ ৰূপান্তৰিত হৈছে তাৰো বৰ্ণনা দাঙি ধৰে।

বঙাইগাঁৱৰ এন টি পি চিৰ মুখ্য মহা প্ৰৱন্ধক চন্দন চক্ৰৱৰ্তীয়ে ৰাজিন্দৰ সিঙক সম্বৰ্ধনা জনোৱাৰ লগতে সমাজখনৰ প্ৰতি তেওঁৰ সামগ্ৰিক বৰঙণিৰ বিষয়ে বিবৰি কয়।

অনুষ্ঠানত কোম্পানীটোৰ সকলো জ্যেষ্ঠ ব্যৱস্থাপক বিষয়া, কৰ্মচাৰী, চি আই এছ এফৰ লগতে বঙাইগাঁৱ এন টি পি চিৰ সমূহ পৰিয়ালৰ সদস্য উপস্থিত থাকে।