পাকিস্তানত আশ্ৰয় লোৱাই হ’ল কাল! জনপ্ৰিয় আফগান গায়িকাক গুলীয়াই হত্যা
তালিবানে আফগানিস্তান দখল কৰাৰ সময়তে প্ৰাণৰ মমতাত এগৰাকী জনপ্ৰিয় আফগান গায়িকাই নিজ দেশৰ পৰা পলায়ন কৰি আশ্ৰয় লৈছিল প্ৰতিবেশী দেশ পাকিস্তানত। পাকিস্তানত আশ্ৰয় লোৱাৰ এই সিদ্ধান্তই শেষত কাল হ’ল আফগান গায়িকাৰগৰাকীৰ।
পাকিস্তানত আশ্ৰয় লৈ থকা আফগানিস্তানৰ জনপ্ৰিয় কণ্ঠশিল্পী হাছিবা নূৰীক গুলীয়াই হত্যা কৰা হৈছে। এই বাতৰি বিয়পি পৰাৰ লগে লগে সমগ্ৰে পাকিস্তানৰ লগতে প্ৰতিবেশী দেশমূহতো তীব্ৰ চাঞ্চল্যৰ সৃষ্টি হৈছে। ছ’চিয়েল মিডিয়াত হাছিবাৰ অনুৰাগীসকলে শোক প্ৰকাশ কৰিছে।
উল্লেখ্য, ২০২১ চনত হাছিবা তালিবানৰ পৰা পলায়ন কৰি পাকিস্তানলৈ আহিছিল। তেতিয়াৰ পৰা তেওঁ পাকিস্তানৰ পেছাৱৰত আছিল। তাতেই অচিনাক্ত দুৰ্বৃত্তই গায়িকাগৰাকীক গুলীয়াই হত্যা কৰে। ঘটনাৰ পিছতে সমগ্ৰ পাকিস্তানতে উত্তেজনাৰ সৃষ্টি হৈছে। পাক আৰক্ষীয়ে ঘটনাস্থলীত উপস্থিত হৈ কণ্ঠশিল্পীগৰাকীৰ মৃতদেহ উদ্ধাৰ কৰি মৰণোত্তৰ পৰীক্ষাৰ বাবে প্ৰেৰণ কৰে।
পাকিস্তানত আশ্ৰয় লৈ থকাৰ পৰাই হাছিবাই আফগানিস্তানত তালিবান শাসনৰ বিৰুদ্ধে সৰৱ হৈ পৰিছিল। আনকি বিভিন্ন সাক্ষাৎকাৰত তেওঁ কেইবাবাৰো নিজৰ দেশৰ নাৰীৰ দুৰ্দশাৰ কথা কৈছিল। লগতে মুক্তকণ্ঠে কৈছিল যে তালিবানে কেনেকৈ নাৰীক অত্যাচাৰ কৰি আছে। সেয়ে ধাৰণা কৰা হৈছে যে এইবোৰ কাৰণতেই গায়িকাগৰাকী দীৰ্ঘদিন ধৰি তালিবানৰ হিট লিষ্টত আছিল।
জানিব পৰা মতে কিছুদিন পূৰ্বে হাছিবাই এটা টিকটক ভিডিঅ’ আপলোড কৰিছিল। তাৰ পৰাই হত্যাকাৰীয়ে তেওঁৰ আত্মগোপন কৰি থকা ঠাইৰ সম্ভেদ লাভ কৰিবলৈ সক্ষম হয় বুলি ধাৰণা কৰা হৈছে।
ইফালে, গায়িকাগৰাকীক গুলীয়াই হত্যা কৰাৰ পাছতে তেওঁৰ অনুৰাগীসকল শোকত ম্ৰিয়মাণ হৈ পৰিছে।