৭ ডিচেম্বৰত গুৱাহাটীত প্ৰসিদ্ধ শাস্ত্ৰীয় সংগীত শিল্পী পাৰবীন চুলতানাৰ সংগীতানুষ্ঠান

অহা ৭ ডিচেম্বৰ, ২০১৯ ৰ সন্ধিয়া সংগীতানুষ্ঠান পৰিবেশনৰ বাবে নিজৰ গৃহ ৰাজ্য অসমত উপস্থিত হ’ব হিন্দুস্তানী শাস্ত্ৰীয় সংগীতৰ বিশিষ্ট কণ্ঠশিল্পী পাৰবীন চুলতানা।

‘দ্যা লাইব্ৰেৰী’ এক অপেছাদাৰী সামাজিক সাংস্কৃতিক গোষ্ঠীৰ দ্বাৰা শ্ৰীমন্ত শংকৰদেৱ কলাক্ষেত্ৰৰ প্ৰেক্ষাগৃহত আয়োজিত হ’বলগীয়া সংগীতানুষ্ঠানত সংগীত পৰিবেশন কৰিব পদ্মভূষণ পাৰবীন চুলতানাই।

‘‘মই ইয়ালৈ আহিবলৈ সুযোগ পাই অতিকৈ উৎফুল্লিত হৈছোঁ আৰু অসমীয়া শ্ৰোতাৰ বাবে সংগীত পৰিবেশন কৰিবলৈ মই অধীৰ আগ্ৰহেৰে অপেক্ষা কৰি আছো। অসম মোৰ অন্তৰাত্মা-মই মহাবাহু ব্ৰহ্মপুত্ৰৰ দেশ অসম সন্তান আৰু অসমীয়া মোৰ মাতৃভাষা। ৭ ডিচেম্বৰ সন্ধিয়ালৈ অসমীয়া শ্ৰোতা ৰাইজৰ বাবে অনুষ্ঠান পৰিবেশন কৰিবলৈ মই অধীৰ আগ্ৰহেৰে অপেক্ষা কৰি আছোঁ।’’ পাৰবীন চুলতানাই কয়।

উল্লেখযোগ্য যে, ৭০ৰ দশকতেই পাৰবীন চুলতানাই হিন্দুস্তানী শাস্ত্ৰীয় সংগীতৰ মাধ্যমেৰে ভাৰতীয় সংগীত জগতত ৰাষ্ট্ৰীয় প্ৰেক্ষাপটত আত্মপ্ৰকাশ কৰিছিল।

১৯৭২ চনত কমল আমৰোহীৰ দ্বাৰা নিৰ্মিত হিন্দী বোলছবি পাকিজাত স্বনামধন্য সংগীতকাৰ নৌশাদৰ সৈতে একলগে কাম কৰাটো পাৰবীন চুলতানাৰ কেৰিয়াৰৰ বাবে মাইলৰ খুটি হিচাপে বিৱেচিত হৈছিল।

প্ৰখ্যাত কণ্ঠশিল্পী লতা মংগেশকাৰৰ জন্মদিনতো পাৰবিন চুলতানাক মুখ্য অতিথি হিচাপে নিমন্ত্ৰণ জনোৱা হৈছিল।