চিৰাং আৰক্ষীৰ অভিযান; নিষিদ্ধ নিচাযুক্ত দ্ৰব্য সহ এজন লোক আটক

চিৰাং আৰক্ষীয়ে মঙলবাৰে দিনৰ ভাগত অবৈধ ড্ৰাগছ সৰবৰাহকাৰীৰ বিৰুদ্ধে এক অভিযান চলায়।

জিলাখনৰ ৰুনিখাটা বজাৰ অঞ্চলত চলোৱা এই অভিযানকালত মধ্যম ৰুনিখাটা অঞ্চলৰ উপেন ৱাৰিৰ পুত্ৰ নিলিখাং ৱাৰি(৪৫) নামৰ এজন লোক আটক হয়।

ব্যক্তিজনক এখন ঔষধৰ দোকানৰ পৰা আটক কৰা হয় বুলি চিৰাং আৰক্ষীয়ে জানিবলৈ দিয়ে।

আৰক্ষীয়ে অভিযানকালত দোকানখনৰ পৰা ভালেসংখ্যক নিচাযুক্ত টেবলেটৰ লগতে এটা নীলা ৰঙৰ বেগত ভৰাই থোৱা নিচাযুক্ত দ্ৰব্য, এটা মোবাইল হেণ্ডচেট আৰু ৪৩১০ টকা উদ্ধাৰ কৰে।

সমগ্ৰ ঘটনা সন্দৰ্ভত আৰক্ষীয়ে অধিক তথ্যৰ বাবে বৰ্তমান সোধ-পোচ অব্যাহত ৰাখিছে বুলি জানিব পৰা গৈছে।

উল্লেখযোগ্য যে, স্থানীয় ৰাইজে ৰুনিখাটাত দীৰ্ঘদিনৰ পৰা গোপনে নিষিদ্ধ নিচাযুক্ত সামগ্ৰীৰ বেহা চলি আহিছে বুলি অভিযোগ উত্থাপন কৰি আহিছে।