তান্ত্ৰিকৰ ভেশত দুৰ্ধৰ্ষ চোৰ: আৰক্ষীৰ জালত যোৰাবাটৰ চুৰিকাণ্ডৰ মাষ্টাৰমাইণ্ড ফাৰুখ ওজা

ধৰ্মীয় বিশ্বাস আৰু অন্ধবিশ্বাসক ঢাল কৰি সৰল লোকক লুণ্ঠন চলাই অহা এজন দুৰ্ধৰ্ষ অপৰাধী অৱশেষত আৰক্ষীৰ জালত পৰিছে। তান্ত্ৰিকৰ বেশ ধৰি মানুহক প্ৰতাৰণা কৰা এই তথাকথিত ‘ওজা’জন যোৰাবাটত সংঘটিত এক বৃহৎ চুৰিকাণ্ডৰ মাষ্টাৰমাইণ্ড হিচাপে চিহ্নিত হৈছে। গুৱাহাটীৰ বশিষ্ঠ আৰু যোৰাবাট আৰক্ষীৰ এক যুটীয়া অভিযানত দেওবাৰে নগাঁৱৰ কচুৱাৰ পৰা অভিযুক্তক গ্ৰেপ্তাৰ কৰা হয়।

প্ৰাপ্ত তথ্য অনুসৰি, যোৱা ১১ ফেব্ৰুৱাৰীত যোৰাবাটৰ শংকৰদেৱ নগৰ নিবাসী গংগা ৰায়ৰ ঘৰত চুৰিকাণ্ড সংঘটিত হৈছিল। পৰিয়ালটো ঘৰত নথকাৰ সুযোগ লৈ চোৰে তলা ভাঙি আলমাৰিৰ পৰা বৃহৎ পৰিমাণৰ সোণৰ অলংকাৰ আৰু অন্যান্য মূল্যৱান সামগ্ৰী লুট কৰি লৈ গৈছিল। এই সন্দৰ্ভত ভুক্তভোগী পৰিয়ালে দাখিল কৰা এজাহাৰৰ ভিত্তিত আৰক্ষীয়ে তদন্ত আৰম্ভ কৰিছিল।

আৰক্ষীৰ অনুসন্ধানত পোহৰলৈ আহে যে এই সমগ্ৰ চুৰিকাণ্ডৰ মূল পৰিকল্পনাকাৰী আছিল তান্ত্ৰিকৰ বেশত থকা ফাৰুখ ওজা নামৰ এজন ব্যক্তি। গোপন সূত্ৰৰ পম খেদি আৰক্ষীৰ দলটোৱে নগাঁৱৰ কচুৱাত অভিযান চলাই ফাৰুখক গ্ৰেপ্তাৰ কৰিবলৈ সক্ষম হয়। আৰক্ষীৰ জেৰাৰ সন্মুখত ফাৰুখে চুৰিৰ কথা স্বীকাৰ কৰাৰ লগতে লুণ্ঠন কৰা সোণৰ অলংকাৰসমূহ ক’ত বিক্ৰী কৰিছিল, তাৰো সবিশেষ তথ্য প্ৰদান কৰে।

ফাৰুখ ওজাৰ স্বীকাৰোক্তিৰ ভিত্তিত আৰক্ষীয়ে লংকাৰ এখন জুৱেলাৰী দোকানত অভিযান চলায়। চুৰিৰ সোণ ক্ৰয় কৰাৰ অভিযোগত খেৰণিৰ নিবাসী তথা জুৱেলাৰীখনৰ স্বত্বাধিকাৰী সন্তোষ কুমাৰ প্ৰসাদক আৰক্ষীয়ে গ্ৰেপ্তাৰ কৰে। এই অভিযানত আৰক্ষীয়ে লুট হোৱা সামগ্ৰীসমূহ উদ্ধাৰ কৰাৰ লগতে নগদ ৫৭,৪২০ টকা, ৪ টাকৈ মোবাইল ফোন আৰু তান্ত্ৰিক কাৰ্যত ব্যৱহাৰ কৰা পোচাক তথা সা-সজুলি জব্দ কৰে।

অভিযুক্ত ফাৰুখ ওজাই দীৰ্ঘদিন ধৰি অসমৰ বিভিন্ন প্ৰান্তত তান্ত্ৰিকৰ ভেশ ধৰি সৰল লোকক আধ্যাত্মিক ভয় বা আশীৰ্বাদৰ প্ৰলোভন দি লুণ্ঠন চলাই আহিছিল। আৰক্ষীয়ে ইতিমধ্যে CNO 64/26 নম্বৰৰ অধীনত এক গোচৰ ৰুজু কৰি অভিযুক্তক আদালতত হাজিৰ কৰায়। আদালতে ফাৰুখ ওজাক জেল হাজোতলৈ প্ৰেৰণ কৰিছে বুলি জানিব পৰা গৈছে।