১ ডিচেম্বৰৰ পৰা সকলো যান-বাহনত FASTag বাধ্যতামূলক; কিদৰে লাভ কৰিব FASTag

কেন্দ্রীয় পৰিবহন মন্ত্রী নীতিন গাডকাৰিয়ে যোৱা মাহত ঘোষণা কৰিছিল যে চলিত বছৰৰ ১ ডিচেম্বৰৰ পৰা সমস্ত যান-বাহনৰ কাৰণে বাধ্যতামূলক হ’ব FASTag। ইয়াৰ পিছত FASTag নথকা যান-বাহন সমূহৰ পৰা দুগুন হাৰত টোল সংগ্ৰহ কৰা হ’ব।

এই পাইলট প্রকল্পটো ২০১৪ চনত আৰম্ভ হৈছিল য’ত Radio Frequency Identification Technology (RFID) প্রযুক্তিৰ সহায়ত বৈদ্যুতিকভাৱে টোল সংগ্রহ কৰা হ’ব। নাথাকিব টোল গেটত শাৰী পাতি থকা সমস্যা।

FASTag কি?

FASTag হৈছে ভাৰতৰ বৈদ্যুতিক টোলিঙৰ প্রয়োজনীয়তা পূৰণৰ বাবে ৰাষ্ট্ৰীয় বৈদ্যুতিক টোল সংগ্রহ প্রোগ্রামৰ আওতাত, নেশ্যনেল পেমেন্ট কর্পোৰেশ্যন অব ইণ্ডিয়া (NPCI) ৰ দ্বাৰা তৈয়াৰ কৰা প্রিপেইড ৰিচার্জেবল টেগ।

টোল সংগ্রহৰ বাবে FASTag টিক গাড়ীৰ উইণ্ড’স্ক্ৰিণত সংযুক্ত কৰিব লাগিব। RFID-চালিত প্রযুক্তি যিখন টোল প্লাজাত উপলব্ধ, সেইপিনে স্বয়ংকৃতভাৱে টোল সংগ্ৰহ কৰা হ’ব।

কিদৰে FASTag কিনিব আৰু ইয়াক কেনেকৈ সক্রিয় কৰিব

ই-কমাৰ্চ প্ল্যাটফর্ম মাধ্যমৰ জৰিয়তে FASTag অনলাইনত উপলব্ধ হ’ব। টেগটো ২৩ টা বেংক নিৰপেক্ষ আৰু আপোনাৰ স্মার্টফোনত ‘FASTag’ App Install কৰি ইয়াক নিজেই সক্রিয় কৰি ল’ব পাৰিব।

লগতে সকলো টোল প্লাজাৰ পৰাও ইয়াক সংগ্ৰহ কৰিব পাৰিব।

কিদৰে ৰিচার্জ কৰিব FASTag

যদি আপুনি আপোনাৰ FASTag টিক আপোনাৰ বেংক একাউণ্টৰ সৈতে সংযুক্ত কৰিছে তেন্তে আপোনাৰ একাউণ্টত পর্যাপ্ত পৰিমাণৰ ধন আছে নে নাই সেয়া নিশ্চিত কৰিলেই হ’ব। টেগটো ৰিচার্জ কৰাৰ দৰকাৰ নাই।

যদি আপুনি FASTag টোক প্রিপেইড Walletত লিংক কৰাৰ সিদ্ধান্ত লয় তেন্তে প্রিপেইড Walletত পৰ্যাপ্ত পৰিমাণৰ ধন ৰাখিব লাগিব।