বাক্সাত অভিযান চলাই ওভতাৰ পথতে ভয়ংকৰ দুৰ্ঘটনা; ভাৰপ্ৰাপ্ত আৰক্ষী বিষয়াসহ দুজনৰ মৃত্যু
আজি পুৱাৰ ভাগত বাক্সা জিলাৰ শালবাৰীৰ গোৱৰ্ধনাত এক শোকাৱহ পথ দুৰ্ঘটনা সংঘটিত হয়। দুৰ্ঘটনাটোত এগৰাকী আৰক্ষী বিষয়াৰ লগতে গাড়ীচালকসহ দুজন লোকে প্ৰাণ হেৰুৱাব লগা হয়।
নিহত আৰক্ষী বিষয়া গৰাকী হৈছে গোৱৰ্ধনা থানাৰ ভাৰপ্ৰাপ্ত আৰক্ষী বিষয়া দেনাগ্ৰা ব্ৰহ্ম, আনহাতে তেওঁৰ সৈতে থকা গাড়ীচালক গৰাকীক বিজন উজিৰ বুলি চিনাক্ত কৰা হৈছে।
প্ৰাপ্ত তথ্য মতে আজি পুৱাৰ ভাগত আৰক্ষীৰ দলটোৱে এ এছ ০১ ডি য়ু ৯৯ নম্বৰৰ ব’লেৰো বাহনখনেৰে জাখলিবিল পথাৰৰ পৰা থানাৰ অভিমুথে আহি থকা অৱস্থাত সংঘটিত দুৰ্ঘটনাটোত তেওঁলোকৰ উপৰি দুজনকৈ বেটেলিয়ান জোৱান আৰু এজন আচামী গুৰুতৰভাৱে আহত হয়।
ঘটনা সন্দৰ্ভত জানিব পৰা অনুসৰি ভাৰপ্ৰাপ্ত আৰক্ষী বিষয়া দেনাগ্ৰা ব্ৰহ্মসহ আৰক্ষীৰ দলটোৱে আজি পুৱতি নিশা জাখলিবিল পথাৰলৈ আচামী আটক কৰিবলৈ গৈ আকৌ থানালৈ উভতি অহাৰ পথত এখন ট্ৰেক্টৰৰ সৈতে মুখামুখি সংঘৰ্ষ লাগে। উল্লেখযোগ্য যে দুৰ্ঘটনাটো ইমানেই ভয়াবহ আছিল যে দুয়োজন লোক থিতাতে নিহত হোৱাৰ লগতে আৰক্ষীৰ দলটোৱে অহা বাহনখন প্ৰায় ধ্বংসপ্ৰাপ্ত হয়।
অৱশ্যে দুৰ্ঘটনাটোৰ ফলত আহত কেইজনক সমীপৰ চিকিৎসালয়লৈ প্ৰেৰণ কৰা হয়। পুৱাই সংঘটিত উক্ত দুৰ্ঘটনাটোৱে সমগ্ৰ অঞ্চলটোতে শোঁকৰ ছাঁ পেলাইছে।